”عزت دو، عزت لو“ نادیہ خان کے بیان پر زرنش کا ردعمل

کراچی (ویب ڈیسک) پاکستانی شوبز انڈسٹری کی سابق اداکارہ زرنش خان نے میزبان نادیہ خان کے بیان پر سخت ردعمل دیتے ہوئے انسٹاگرام پر ایک اسٹوری شیئر کی ہے۔ حال ہی میں نادیہ خان کا ایک بیان سوشل میڈیا پر وائرل ہوا تھا، جس میں انہوں نے ہانیا عامر اور بھارتی اداکار دلجیت دوسانجھ کے بارے میں وضاحت دیتے ہوئے کہا کہ ان کی رائے میں تبدیلی ہانیا عامر کی وجہ سے نہیں، بلکہ دلجیت کے رویے کی بنیاد پر آئی ہے۔ نادیہ خان نے مزید کہا کہ وقت کے ساتھ رائے میں تبدیلی یوٹرن نہیں ہوتی، بلکہ یہ عقل مندی ہوتی ہے۔ زرنش خان نادیہ خان کے اس بیان پر سخت ردعمل دیتے ہوئے کہا کہ جب آپ دوسروں کے بارے میں منفی باتیں کرتی ہیں تو انہیں کیسا محسوس ہوتا ہے؟ شاید اب نادیہ خان کو اس کا اندازہ ہو چکا ہو گا۔ زرنش نے سوال کیا کہ نادیہ خان کس حق سے دوسروں کی شخصیات پر تبصرہ، مذاق یا تنقید کرنے کی اجازت رکھتی ہیں؟ زرنش نے مزید کہا کہ "عزت دو تو عزت ملے گی، اپنی زبان پر قابو رکھو، تاکہ کسی کو تمہارے خلاف کچھ کہنے کا موقع نہ ملے۔" انہوں نے یہ بھی کہا کہ جب بات خود پر آتی ہے تو برداشت کرنا مشکل لگتا ہے، لیکن دوسروں کے بارے میں کچھ کہنا بہت آسان ہوتا ہے۔ زرنش نے عوام کو بھی نصیحت دی کہ ہر شخص کو اپنے کام سے کام رکھنا چاہیے اور دوسروں کی ذاتی زندگی میں مداخلت سے بچنا چاہیے۔