سنڌ واڳن جي گھيري ۾ آھي، سنڌو درياھ تي حملو ڪندڙن سان پيپلزپارٽي گڏ آھي: اياز لطيف پليجو

حيدرآباد (بيورو) قومي عوامي تحريڪ جي سربراھ اياز لطيف پليجي چيو تہ سنڌ واڳن جي گھيري ۾ آھي سنڌي ماڻهو پنهنجي درياھ، زمينن ۽ وسيلن کي بچائڻ لاءِ اڳواڻي وارو ڪردار ادا ڪن. سنڌو درياھ تي حملو ڪندڙن سان پيپلزپارٽي گڏ آھي سنڌو درياءَ مان 6 نوان ڪئنال ڪڍڻ سان سنڌ بنجر ٿيڻ سان گڏ ڏڪار جو شڪار ٿي ويندي ۽ جر جو پاڻي زھريلو ٿي ويندو. سمنڊ ٺٽو، بدين ۽ سجاول ضلعن کي مڪمل ڳڙڪائي ويندو. اياز لطيف پليجي چيو تہ سنڌ ۾ ڪرپشن، بدامني لاقانونيت ،ميرٽ جي لتاڙ ۽ منشيات پيپلز پارٽي جو ڏنل تحفو آهي، پيپلزپارٽي جي سنڌ حڪومت سنڌ کي غلام بنائڻ لاءِ جھالت، غربت مسلط ڪري ڇڏي آھي سنڌ کي ھٿ وٺي تباھ ڪيو ويو آھي پيپلز پارٽي جي خراب حڪمراني سنڌ جي ماڻھن کي فقير بنائي ڇڏيو آھي. نوڪرين، روزگار ۽ وسيلن تي ڌاڙا ھنيا پيا وڃن. ھاڻ اقتدار خاطر درياھ، زمينن ۽ وسيلن کي وڪرو ڪيو پيو وڃي. اياز لطيف پليجي چيو تہ سفارشي ۽ ڪرپشن ڪلچر اسان جي انفراسٽڪچر کي تباھ ڪيو آھن۔ وزيرن ۽ ايم پي اي، ايم اين اي جي ھٿ۾ ڪجھ ناھي. اڳتي وڌڻ جا 2 رستا تعليم ۽ سياست آھي. ڪرپٽ، دھشتگرد، انتھاپسند ۽ عوام دشمن جاگيردار سياست کي پنھنجن مفادن لاءِ استعمال ڪري رھيا آھن، وطن دوست، عوام دوست، علم دوست ۽ انسان دوست ماڻھو اڳتي اچي دو نمبر ماڻھن کان سياست جو ميدان ڦري وٺن. تعليم، صحت، ترقي، روزگار سميت ھر معاملو سياست سان جڙيل آھي. سنڌ جي بقا جو واحد رستو سياست ۽ تعليم آھي.