عمرڪوٽ ۾ بيواهه عورت ۽ سندس ڌيءَ تي مبينا تشدد ۽ سندن گهر تي قبضي خلاف ڌرڻو

مرحوم چنيسر راهمون جي ملڪيت تي قبضي ۽ سندس بيواهه ۽ ڌيءَ تي تشدد جي مذمت ڪريون ٿا: مظاهرين

عمرڪوٽ (رپورٽ:ڪانجي مل رکيسر) عمرڪوٽ جي رحيم ڪالوني ۾ ٻه ڏينهن اڳ مرحوم حاجي چنيسر راهمون جي بيوهه مقيمان ۽ ڌيءَ خديجه جي گهر تي مبينا طور ھنج ورتل پٽ روشن راهمون ۽ ساٿين پاران حملي، تشدد ۽ ڦرلٽ واري واقعي جي جوابدارن جي گرفتاري لاءِ راهمون برادري جو احتجاج جاري، واقعي بابت بيوهه جي فرياد تي سٽي ٿاڻي تي روشن راهمون، اسد راهمون، مولا بخش هاليپوٽو، ممتاز سومرو، اسماعيل نھڙي، صالح آريسر ۽ هڪ نامعلوم جوابدار خلاف ڪيس داخل ڪيو ويو هو، پر پوليس اڃان تائين ڪنهن به جوابدار کي گرفتار نه ڪيو آهي، ذرائع موجب جوابدارن کي هاءِ ڪورٽ مان 15 ڏينهن جي ضمانت ملي وئي آهي، جڏهن ته متاثرن جو چوڻ آهي ته پوليس بااثر سياستدانن ۽ اثر رسوخ رکندڙ ماڻهن جي چوڻ تي بتماشائي بڻيل آهي، مظاهرين الزام هنيو ته جوابدار کلي عام موتمار ڌمڪيون ڏئي رهيا آهن ۽ پوليس کين گرفتار ڪرڻ بجاءِ تحفظ فراهم ڪري رهي آهي، احتجاج جي اڳواڻي نظام راهمون، مشتاق راهمون، نرمل ميگهواڙ، گل منير ولھاري، يوسف سميجو، قمرالدين راهمون، ممتاز راهمون، مانجھي راهمون، عبدالخالق سميجو ۽ محمد عمر نھڙي ڪئي، مظاهرين پريس ڪلب عمرڪوٽ آڏو مين روڊ بلاڪ ڪري سخت نعريبازي ڪئي ۽ الزام هنيو ته پوليس جوابدارن کان پئسا وٺي کين ضمانت ڪرائڻ جو موقعو فراهم ڪيو آهي، متاثرہ خديجه راهمون جو چوڻ هو ته گذريل ڏينهن پوليس گهر مان ڦاٽل ڪپڙا جاچڻ جي بهاني آئي، پر ان دوران تيل جي مد ۾ پنج هزار رپيا نقد وٺي وئي، مظاهرين چيو ته عمرڪوٽ پوليس ۽ بااثر سياستدانن جي ملي ڀڳت سان انصاف جو قتل ڪيو پيو وڃي، جنهن جو ثبوت اهو آهي ته جوابدارن جي ضمانت کانپوءِ به ڪيس ۾ اڳڀرائي نه ٿي آهي، راهمان برادري ڊي آءِ جي ۽ ايس ايس پي عمرڪوٽ کان مطالبو ڪيو ته فوري طور جوابدارن کي گرفتار ڪري انصاف فراهم ڪيو وڃي، ٻي صورت ۾ پوري ضلعي ۾ احتجاجي تحريڪ شروع ڪئي ويندي.