ڏوڪري جي ڊاڪٽر جي مبينا غفلت سبب نوجوان تڙپي تڙپي فوت، وارثن پاران انصاف جو مطالبو

اصغر علي کوکر کي بخار هو، ڊاڪٽر امجد شاهه غلط انجيڪشن لڳائي جنهن سبب فوت ٿي ويو، انصاف ڪيو وڃي: وارث

ڏوڪري(اطهر ميمڻ) ڏوڪري جي خانگي اسپتال ۾ ڊاڪٽر امجد شاهه جي مبينا غلط انجيڪشن لڳڻ سبب نوجوان تڙپي تڙپي فوت ٿي ويو. تفصيل موجب 22 ورھين جو نوجوان اصغر علي ولد گل حسن کوکر ڏوڪري جي خانگي اسپتال ۾ ڊاڪٽر امجد شاهه طرفان مبينا غلط ھنڌ انجيڪشن لڳڻ ڪري زخم بعد ناسور ٿي ويو. نوجوان کي وارثن لاڙڪاڻي اسپتال پھچايو جتي ھو تڙپي تڙپي فوت ٿي ويو. ان موقعي تي نوجوان جي وارثن ٻڌايو ته ڏوڪري جي خانگي اسپتال ۾ نوجوان اصغر کوکر کي ڊاڪٽر طرفان بخار جي مبينا غلط انجيڪشن ھڻڻ ڪري زھر سندس جسم ۾ ڦھلجي ويو، جنھن سبب کيس لاڙڪاڻي اسپتال داخل ڪرايو جتي ھو تڙپي تڙپي فوت ٿي ويو. ٻئي طرف نوجوان جي جنازي نماز بعد کيس ڳوٺ يار محمد کوکر ۾ اباڻي قبرستان ۾ مٽيءَ ماءُ حوالي ڪيو ويو.