ملير: اسٽيل مل جي پورهيتن جو نوڪرين تي بحالي، پاڻي ۽ گيس جي فراهمي لاءِ ڌرڻو

ملازمن ڌڻي بخش سمون، اڪبر ناريجو ۽ امجد زرداري ۽ ٻين جي اڳواڻي ۾ ريلي ڪڍي ڌرڻو هنيو ويو

ملير (رپورٽ: عبدالرشيد مورجھريو) پاڪستان اسٽيل مل جي پورهيتن نوڪرين تي بحال نه ڪرڻ، پاڻي ۽ گيس جي فراهمي بند ڪرڻ خلاف ريلي ڪڍي ۽ ڌرڻو هنيو. احتجاج جي اڳواڻي ڌڻي بخش سمون، اڪبر ناريجو ۽ امجد زرداري ڪئي. ريلي ٽائون شپ ڊپارٽمينٽ تائين پهچي ڌرڻو هنيو ويو.پورهيتن اڳواڻن الزام هنيو ته اسٽيل مل جي تباهي کان پوءِ هاڻي ملازمن کي اسٽيل ٽائون مان لڏائڻ لاءِ بجلي جا ڳرا بل موڪليا پيا وڃن. هڪ مهيني کان گلشن حديد ۽ اسٽيل ٽائون ۾ پيئڻ جي پاڻيءَ جو شديد بحران آهي، جنهن جو ذميوار انتظاميا آهي.احتجاج ڪندڙن چيو ته پيئڻ جو پاڻي ۽ گيس بند ڪئي وئي آهي ۽ هاڻي بجلي بند ڪرڻ جي سازش ڪئي پئي وڃي. هنن سي اي او اسٽيل مل کي پوري صورتحال جو ذميوار قرار ڏيندي سندس فوري هٽائڻ جو مطالبو ڪيو.اڳواڻن اعلان ڪيو ته سڀاڻي کان ڪنهن به آفيسر کي اسٽيل مل ۾ اچڻ نه ڏنو ويندو ۽ آفيسن آڏو احتجاج ڪيو ويندو. وفاقي حڪومت کي گهر ڪئي وئي ته پورهيتن جا مسئلا فوري حل ڪيا وڃن.