ٺٽي ۾ معرڪه حق جي حوالي سان منشيات خلاف ريلي ڪڍي وئي

ريلي جي اڳواڻي اي ڊي سي ون غلام دستگير شيخ پاران ڪئي وئي

ٺٽو( شفيق ڀٽي)جشنِ آزادي "معرڪه حق" جي سلسلي ۾ ايڊيشنل ڊپٽي ڪمشنر ون غلام دستگير شيخ جي اڳواڻي ۾ گٽڪي، مائي ۽ ٻين نقصانڪار نشي آور شين جي خلاف عوامي شعور اجاگر ڪرڻ لاءِ صحت کاتي ۽ مڪاني ڊاڪٽرن جي سهڪار سان سول اسپتال مڪلي کان آگاهي ريلي ڪڍي ويئي . ريلي جو مقصد نوجوانن ۽ عام ماڻهن کي انهن موذي عادتن کان بچائڻ ۽ صحتمند زندگي ڏانهن راغب ڪرڻ هو. شرڪت ڪندڙن هٿن ۾ پلي ڪارڊ ۽ بينر کڻي رکيا هئا جن تي "منشيان کان انڪار، زندگي سان پيار"، "گٽڪو – موت جو پيغام"، ۽ "نشو – هڪ ناسور" جهڙا نعرا لکيل هئا . ان موقعي تي ايڊيشنل ڊپٽي ڪمشنر غلام دستگير شيخ، اسسٽنٽ ڪمشنر شاڪر فهيم، ڊسٽرڪٽ هيلٿ آفيسر ڊاڪٽر سيد صفدر علي شاهه، مشهور ۽ معروف سينيئر ڊينٽل سرجن ڊاڪٽر شيام ڪمار، سول سرجن ڊاڪٽر يامين شاهه، ايڊيشنل ڊائريڪٽر سوشيل ويلفيئر خدا بخش ٻهراني ۽ ٻين خطاب ڪندي چيو ته گٽڪو، مائو ۽ نشي آور شين جي استعمال سبب ڪينسر سميت ڪيترائي موذي ۽ جان ليوا مرض جنم وٺن ٿا، تنهنڪري اسان کي پنهنجي نوجوان نسل کي ان ناسور کان بچائڻ لاءِ گڏجي جدوجهد ڪرڻي پوندي . هنن عزم جو اظهار ڪيو ته اهڙين آگاهي مهمن جو سلسلو مستقبل ۾ به جاري رهندو ته جيئن صحتمند ۽ منشيان کان پاڪ سماج جوڙجي سگهي . ريلي ۾ ڊاڪٽرن، پيراميڊيڪل اسٽاف، تعليم، صحت، روينيو کاتن جي عملدارن، مختلف اين جي اوز، سول سوسائٽي جي نمائندن ۽ وڏي انگ ۾ شهرين شرڪت ڪئي.