ٺٽي ۾ جشن آزادي معرڪه حق ۽ پوليس جي شهيدن جي حوالي سان تقريب منعقد

ڊي سي منور عباس سومرو، ايس ايس پي فاروق احمد بجاراڻي سان گڏ شهيدن جي يادگار تي گُلدستو چاڙهي فاتحه ڪئي

ٺٽو(محمد شفيق ڀٽي)جشن آزادي معرڪہ حق جي حوالي سان ڊپٽي ڪمشنر ٺٽو منور عباس سومرو، ايس ايس پي فاروق احمد بجاراڻي سان گڏ ايس ايس پي آفيس ۾ شهيدن جي يادگار تي گُلدستو چاڙهي فاتحه ڪئي ۽ شهيدن جي عظيم قرباني کي خراج تحسين پيش ڪيو، جڏهن ته پوليس جي دستي پاران سلامي پڻ پيش ڪئي وئي. ان موقعي تي اسسٽنٽ ڪمشنر شاڪر فهيم، ايس ڊي پي او وحيد بيگ لاڙڪ، ڊي ايس پي هيڊ ڪوارٽر فضل قريشي، ڊي ايس پي شڪايت سيل سيد علي گوهر شاهه، ڊي آءِ بي انچارج انسپيڪٽر اي ڊي شيخ ۽ ٻيا آفيسر پڻ موجود هئا. بعد ۾، ڊپٽي ڪمشنر ۽ ايس ايس پي پاران ڪانفرنس هال ۾ شهيدن جي وارثن سان ملاقات ڪئي ۽ انهن کي تحفا پڻ پيش ڪيا. ان موقعي تي ايس ايس پي فاروق احمد بجاراڻي چيو ته اڄوڪي تقريب نه رڳو شهيدن کي خراج تحسين پيش ڪرڻ آهي پر زنده اهلڪارن لاءِ جرئت، جذبي ۽ فرض جي احساس جي عملي پيغام سان گڏوگڏ شهيدن جي خاندانن جي حوصلا افزائي ۽ مدد ڪرڻ پڻ آهي. هن چيو ته شهيد اسان جا محسن آهن، قوم سندن قرضدار آهي، شهيدن جي قربانين تي فخر آهي، انھن جون لازوال قربانيون ناقابل فراموش آهن. هُن مادر وطن جي امن ۽ سلامتي لاءِ پنهنجون جانيون قربان ڪندڙ پوليس، پاڪ فوج ۽ ٻين شهيدن کي به خراج تحسين پيش ڪيو. بعد ۾ ڊپٽي ڪمشنر ۽ ايس ايس پي ٻين سمورن عملدارن سان گڏ پوليس لائن مسجد ۾ منعقد قرآن خواني ۾ شرڪت ڪئي ۽ شهيدن جي ايصال ثواب لاءِ فاتحه خواني ڪئي جڏھن تہ پاڪ فوج، پوليس ۽ ٻين سمورن ادارن جي شهيدن جي بُلند درجن ۽ ملڪ ۽ قوم جي سالميت، استحڪام ۽ حفاظت لاءِ دعا پڻ گهري. ان کان علاوه ڊپٽي ڪمشنر منور عباس سومرو، اسسٽنٽ ڪمشنر شاڪر فهيم ۽ ٻين آفيسرن سان گڏ مڪلي قبرستان ۾ پاڪ فوج جي شهيدن جي قبرن تي حاضري ڀري ۽ گلن جي چادر چاڙهي سندن مغفرت لاءِ دعا گهري.