گلشن حديد ۽ اسٽيل ٽائون ۾ پاڻي جو بحران، جماعت اسلامي ۽ شهرين جو اسٽيل مل انتظاميا خلاف احتجاج

گلشن حدید ۾ ٽينڪر مافيا جو راڄ قائم آهي، جيڪي ڳري اگهه تي پاڻي وڪرو ڪري رهيا آهن: اڳواڻ

ملير (رپورٽ : عبدالرشيد مورجھريو) گلشن حدید ۽ اسٽيل ٽائون ۾ گذريل هڪ مهيني کان پاڻي جي بحران خلاف جماعت اسلامي ۽ مقامي رهواسين پاران اسٽيل مل انتظاميا خلاف سخت احتجاج ڪيو ويو.احتجاج دوران مظاهرو ڪندڙن هٿن ۾ بينر ۽ پلي ڪارڊ کڻي اسٽيل مل انتظاميا خلاف زوردار نعريبازي ڪئي وئي. مظاهرو ڪندڙن جو چوڻ هو ته گلشن حدید ۾ ٽينڪر مافيا جو راڄ قائم آهي، جيڪي ڳري اگهه تي پاڻي وڪرو ڪري رهيا آهن، جڏهن ته سرڪاري لائين ذريعي پاڻي جي فراهمي مڪمل طور بند آهي.شهرين شڪايت ڪئي ته اسٽيل مل انتظاميا بجلي جي لائن ۾ فالٽ جو جواز ڄاڻائي پاڻي جي فراهمي بند ڪري ڇڏي آهي، جڏهن ته هڪ مهينو گذرڻ باوجود اڃا تائين مسئلو حل نه ڪيو ويو آهي.مظاهرو ڪندڙن چٽا ڏنو ته جيڪڏهن ترت پاڻي جي فراهمي بحال نه ڪئي وئي ته احتجاج جو دائرو وڌايو ويندو ۽ اسٽيل مل انتظاميا جي آفيس اڳيان ڌرڻو هنيو ويندو.