معياري تعليم جو فروغ ضلعي انتظاميہ جي اولين ترجيح آهي: ڊي سي سجاول زاهد حسين رند

سمر ڪيمپ ۾ ٻارن کي بهترين صحتمند سرگرميون فراهم ڪيون ويون جيڪو ساراهه جوڳو عمل آهي

سجاول (رپورٽر) ڊپٽي ڪمشنر سجاول زاهد حسين رند چيو آهي ته معياري تعليم جو فروغ ضلعي انتظاميہ جي اولين ترجيح آهي، اسڪولن کي درپيش مسئلن کي حل ڪرڻ، بنيادي سهولتن جي فراهمي ۽ جديد ٽيڪنالاجي سان آراستہ تعليم وقت جي اھم ضرورت آهي. اھڙن خيالن جو اظهار هُن خواجہ ڪميونٽي بيس اسڪول سجاول پاران منعقد ڪيل ڏهن ڏينهن واري سمر ڪيمپ جي اختتامي تقريب کي مهمان خاص طور خطاب ڪندي ڪيو. ڊپٽي ڪمشنر چيو ته سجاول ضلعو سنڌ جو هڪ پٺتي پيل علائقو آهي جتي تعليم کاتو تمام اهم ڪردار ادا ڪري رهيو آهي، سمر ڪيمپ ۾ ٻارن کي بهترين صحتمند سرگرميون فراهم ڪيون ويون جيڪو ساراهه جوڳو عمل آهي. هن چيو ته بنيادي تعليم هر ٻار جو حق آهي جنهن لاءِ ضلعي انتظاميہ هر ممڪن ڪوشش ڪري رهي آهي. ڊپٽي ڪمشنر خواجه ڪميونٽي بيس اسڪول جي اُستادن ۽ انتظاميہ جي ڪارڪردگي جي تعريف ڪندي شاگردن جي بهتر تعليم ۽ تربيت لاءِ پنهنجي مڪمل تعاون جو يقين پڻ ڏياريو. ان موقعي تي ڊپٽي ڪمشنر ٻارڙن پاران لڳايل مختلف اسٽالن جو دورو ڪري سندن حوصلہ افزائي پڻ ڪئي. ڏهن ڏينهن واري سمر ڪيمپ ۾ شاگردن آرٽ، سائنس، موسيقي، مصنوعي ذهانت، انفارميشن ٽيڪنالاجي، انگريزي ٻولي ۽ ٻيا مختلف تجربہ ڪري لطف اندوز ٿيا. تقريب ۾ اسڪول جي پرنسپل ميڊم زيبا پروين، صدر شيعه امامي اسماعيلي ڪائونسل ٺٽو ۽ شاهبندر ڊاڪٽر نذير احمد خواجه، اعزازي سيڪريٽري شيعه امامي اسماعيلي ڪائونسل ٺٽو ۽ شاهبندر بلاول خواجه، چيئرمين آغا خان سوشل ويلفيئر بورڊ ظهير حسين خواجه، مُکي نوروز علي خواجه، مُکي معشوق علي خواجه، ڪوآرڊينيٽر سي بي ايس اسڪولز سنڌ شريف بيگ، رحيم خواجه، عارف ميمڻ ۽ ٻيا پڻ موجود هئا.