ٻارڙن جي پيدائش ۾ وقفو ڪرڻ سان آبادي تي ڪنٽرول ڪري سگهجي ٿو: فراز احمد عباسي

ٺٽي ۾ ايڊيشنل ڊپٽي ڪمشنر ٽو فراز احمد عباسي جي صدارت هيٺ اجلاس

ٺٽو( شفيق ڀٽي) ايڊيشنل ڊپٽي ڪمشنر ٺٽو ٽو فراز احمد عباسي چيو آھي تہ ٻارڙن جي پيدائش ۾ وقفو ڪرڻ سان اسان نه صرف آبادي تي ڪنٽرول ڪري سگھنداسين، پر ان سان گڏوگڏ اسان ھڪ ترقي يافتہ، صحتمند ۽ خوشحال معاشري جو سنگ بنياد وجھي سگھون ٿا، ھن اھي ڳالھيون پاپوليشن کاتي ۽ صحت کاتي ٺٽي پاران دربار ھال مڪلي ۾ ماء ۽ ٻار جي صحت بابت سڏايل ھڪ اھم اجلاس کي خطاب ڪندي ڪيون. ايڊيشنل ڊپٽي ڪمشنر ٺٽو ٽو فراز احمد عباسي ضلعي ٺٽي مان موتمار بيماري ايڊز جي مڪمل خاتمي لاء شريڪ مختلف سرڪاري توڙي غير سرڪاري ادارن جي سربراهن کي مشورو ڏيندي وڌيڪ چيو ته ايڊز بيماري جي خاتمي لاء تشخيص سينٽر ۽ ڪيمپون قائم ڪيون وڃن، جيئن ڪيس ظاھر ٿيڻ جي صورت ۾ انھن جو بھتر ۽ جديد علاج شروع ڪرائي سگھجي. پاپوليشن کاتي ضلعي ٺٽي پاران سڏايل اجلاس ۾ ڊسٽرڪٽ پاپوليشن آفيسر ٺٽو قاضي نديم سرور، ڊاڪٽر ريحانہ، سول سرجن ٺٽو ڊاڪٽر يامين شاھ، مرف جو نمائندو ڊاڪٽر دائود ھيلايو، اين آر سي پي پاران ڊاڪٽر آڪاش عباسي، ڊاڪٽر شاھدہ ميمڻ، ھينڊز جي ثمينه، ڊسٽرڪٽ پاپوليشن آفيس جي ياسر پليجو، ورلڊ فوڊ پروگرام جي تحسين احمد ۽ ٻيا پڻ شريڪ ھئا، ان موقعي تي ڊسٽرڪٽ پاپوليشن آفيسر ٺٽو قاضي نديم سرور چيو تہ آبادي تي ڪنٽرول ڪرڻ وقت جي اھم ضرورت بڻجي ويئي اھي، ان ڪري جيترو ڪٽنب گھٽ ھوندو، اوترو ئي ھن مھنگائي واري دور ۾ ماڻھون خوشحال زندگي گذاري سگھندو، ھن چيو تہ اسانجي پاپوليشن کاتي جو بہ اھوئي پيغام آھي تہ گھٽ ٻار ھجڻ سان ڪٽنب خوشحال زندگي گذاري سگھي ٿو، ان ڪري ھر ماڻھون ان تي عمل ڪري پنھنجي بھتر زندگي گذارڻ لاء آبادي تي ڪنٽرول ڪري.