پيپلز پارٽي اقتدار ۾ اچي سنڌي ماڻھن جي اميدن جي برخلاف ڪم ڪيو آھي: اياز لطيف پليجو

حيدرآباد: قومي عوامي تحريڪ جي سربراھ اياز لطيف پليجي چيو آهي تہ پيپلز پارٽي اقتدار ۾ اچي سنڌي ماڻھن جي اميدن جي برخلاف ڪم ڪيو آھي. جمھوريت جو نعرو صرف ڏيکاء لاءِ ھنيو آھي، عملي طور عوام دشمن، پورھيت دشمن، اظھار جي آزادي خلاف، عورتن، اقليتن ۽ انساني حقن جي خلاف ڪم ڪيو آھي. جيڪي سردار، وڏيرا، جاگيردار عوام کي نپوڙين، ۽ استحصال ڪن ٿا، انھن کي طاقتور بنايو آھي. سنڌ ۾ آئين ۽ قانون جي حڪمراني ناھي. سنڌ ۾ ڌاڙيلن ۽ جرڳائي ماڻھن جو راڄ آھي. پوليس ۽ انتظاميه ذاتي ۽ سياسي مفادن لاءِ استعمال ڪئي وڃي ٿي. اياز لطيف پليجي چيو تہ سڄي دنيا مان غير قانوني ماڻھو نڪري سنڌ پھچن ٿا تہ پ پ ووٽ جي لالچ ۾ انھن کي شناختي ڪارڊ ۽ تحفظ ڏئي ٿي. سڄي دنيا ۾ غير قانوني پرڏيهين کي برداشت نه ڪيو ويندو آھي پر پاڪستان ۾ سنڌ عالمي يتيم خانو بنايو ويو آھي. افغاني، بنگالي، بھاري، برمي ۽ ٻيا غير قانوني پرڏيھي روزگار ۽ وسيلن تي قابض آھن، انھن شناختي ڪارڊ ٺھرائي ڇڏيا آھن، انھن کي تڙي واپس پنھنجن ملڪن ڏانھن موڪلڻ بدران ڪرپشن تحت تحفظ ڏنو وڃي ٿو. اياز لطيف پليجي چيو ته سنڌ جي زراعت کي ھٿ وٺي تباھ ڪيو ويو آھي. جيڪو فصل پوکيو وڃي ٿو، ان جا اگھ ڪيرايا وڃن ٿا. ڪارخانيدارن جون شيون مهانگيون ڪيون وڃن ٿيو ۽ آبادگارن جا فصل ٽڪي برابر ڪيا وڃن ٿا. اھا معاشي ناانصافي آھي. ھوڏانھن ٻئي پاسي قومي عوامي تحريڪ جو مرڪزي وفد قومي عوامي تحريڪ جي مرڪزي جنرل سيڪريٽري ايڊووڪيٽ مظھر راھوجو، مرڪزي ترجمان اشرف پليجو ، شوڪت تنيو،پنھل سولنگي، ايڊووڪيٽ مير کوسو جي اڳواڻي ۾ تحريڪ تحفظ آئين پاڪستان پاران 20،21 سيٽمبر تي اسلام آباد ۾ ٿيندڙ قومي مشاورتي ڪانفرنس شريڪ ٿيڻ لاءِ اسلام آباد روانو.