مڪلي تي بلڊنگ جي ڪم دوران ڇت ڪِري پئي، 3 پورهيت دٻجي ويا، هڪ فوت

سينئر سٽيزن سينٽر جي نئين ٺھندڙ بلڊنگ جي ھلندڙ ڪم دوران ڇت ڌماڪي سان ڪِري پئي

ٺٽو( شفيق ڀٽي) مڪلي تي سينئر سٽيزن سينٽر جي نئين ٺھندڙ بلڊنگ جي ھلندڙ ڪم دوران ڇت ڪري پئي 3 پورھيت ملبي ھيٺ دٻجي ويا ھڪ ڄڻو فوت ٻن کي بچايو ويو تفصيل موجب مڪلي جنگشاهي روڊ وٽ سوشل ويلفئير آفيس ڀرسان ڪروڙين رپين جي لاڳت سان تعمير ٿيندڙ سينئر سٽيزن عمر رسيدہ ماڻھن جي سار سنڀال لاء شيلٽر هوم جي اڏاوت هيٺ عمارت جي ڇت ۾ ٺيڪيدار پاران ناقص مٽيريل استعمال ڪرڻ سبب ڇت ڌماڪي سان ڪري پئي جنهن جي نتيجي ۾ ٽي مزدور ملبي هيٺ دٻجي ويا ٻن مزدورن کي ڳري مشينري ۽ مقامي ماڻهن جي مدد سان بچايو ويو جڏهن ته هڪ مزدور رستم ڳاھو فوت ٿي ويو. ھتان جي سياسي سماجي اڳواڻن ان واقعي تي سخت افسوس جو اظھار ڪندي چيو آھي تہ سوال اھو پيو ٿئي ته جيڪڏهن سينئر سٽيزن شيلٽر هوم مڪمل ٿي چڪو هجي ها ته انھي بلڊنگ ۾ ناقص مٽيريل استعمال ڪرڻ سبب وڌيڪ جانيون ضايع ٿي سگهن پيون. ٻڌايو پيو وڃي ته ان شيلٽر هوم جو ٺيڪيدار پاڻ کي صوبائي وزير جو خاص ماڻهو سڏائي ٿو. ٺٽي جي عوام حڪومت سنڌ کان مطالبو ڪيو آهي ته انهيءَ ٺيڪيدار خلاف سخت ڪارروائي ڪئي وڃي ۽ سندس ٺيڪو منسوخ ڪيو وڃي.سندس ڪمپني کي ھميشہ لا بليڪ لسٽ ڪيو وڃي ۽ انجنيئر، اسٽنٽ انجنيئر، سرويئر، داروغي سميت ذميوار آفيسرن تي پڻ ڪيس داخل ڪيو وڃي