تڪراري ڪئنال منصوبو سنڌ دشمن ۽ تباهي وارو منصوبو آهي: اياز لطيف پليجو

حڪمران نٿا سمجھن ته ھي وقت صوبن کي جوڙڻ جو آھي، ويڇا وجھڻ ۽ ٽوڙڻ جو ناھي. وفاق، پارليامينٽ ۽ عدليه سنڌ جي عوام جي شڪايت نٿا ٻڌن

ٺٽو (شفيق ڀٽي) چولستان سميت 6 ڪئنال ڪڍي سنڌو درياھ تي ڌاڙي، سنڌ کي بنجر بڻائڻ خلاف قومي عوامي تحريڪ جو پيادل مارچ چوٿين ڏينھن اياز لطيف پليجو، ممتاز شيخ ،اشرف پليجو ،ياسر جاکرو، حبيب الله پليجو، غفور سومرو، مرتضي لاشاري، امين جوڻيجو ،شفيع محمد پليجو، رب ڏنو ملڪ سنڌياڻي تحريڪ جي اڳواڻن نصرت خاصخيلي ،صبا سمون جي اڳواڻي ۾ رڪشا اسٽاپ پھتو گجو، مڪلي، ايڌي سينٽر وٽ قافلي جي مٿان گلن جي ورکا ڪري اجرڪون اوڍائي شاندار استقبال ڪيو ان موقعي تي درياھ بچايو جلسي اياز لطيف پليجي کي خطاب ڪندي چيو تہ پاڻي کوٽ جي ڪري سڄي سنڌ سڪي رھي آھي. ڪوبہ پڇڻ وارو ناھين واپڊا چيئرمين ٻڌائي چڪو آھي تہ 6 ڪئنالن جي منظوري پيپلز پارٽي ڏني آھين سنڌ ۾ زراعت، تعليم، صحت ۽ گورننس تباھ ٿي چڪي آھي. پيپلز پارٽي سنڌ جو درياھ ۽ وسيلا ڏئي اقتدار خريد ڪيو آھي. چولستان ۽ ٻيا 6 ڪئنال ٺھيا تہ سنڌ بنجر ٿي ويندي. اياز لطيف پليجي چيو تہ حڪمران نٿا سمجھن ته ھي وقت صوبن کي جوڙڻ جو آھي، ويڇا وجھڻ ۽ ٽوڙڻ جو ناھي. وفاق، پارليامينٽ ۽ عدليه سنڌ جي عوام جي شڪايت نٿا ٻڌن. اياز لطيف پليجي چيو تہ سنڌ مان چونڊيل سڀني پارٽين عوام کي مايوس ڪيو آھي. اھي پنھنجو احتساب ڪن. وزيراعظم کي سوچڻ گھرجي تہ 3 سالن ۾ عوام ڇا وڃايو ڇا حاصل ڪيو آھي. اياز لطيف پليجي چيو تہ سنڌ حڪمرانن کان پڇي رھيو آھي تہ اسان کي ڀڙڀانگ ۽ بنجر ڇو پيو ڪيو وڃي. سنڌ جي ڪيترن ئي ضلعن ۾ پيئڻ جو صاف پاڻي ناھي. سمنڊ زمين ڳڙڪائي رھيو آھي. سنڌ کي بنجر بنايو پيو وڃي. سنڌ اسيمبلي، ايم پي ايز، ايم اين ايز ڪٿي آھن؟ اياز لطيف پليجي چيو تہ ارسا، واپڊا، سي ڊي ڊبليو پي ۽ سي سي آء تعصب سان ڀريل ادارا ثابت ٿيا آھن. وفاقي ۽ صوبائي حڪمران سنڌ جي عوام. جو استحصال بند ڪن. اياز لطيف پليجي چيو تہ سنڌ جو عوام ھر قيمت تي پاڻي ۽ وسيلن جو دفاع ڪندو. بندرگاھ، گئس ۽ پئٽرول ڏيندڙ سنڌ کان پاڻي نه کسيو وڃي. سنڌ جي پاڻي، زمينن، ٻيٽن ۽ وسيلن تي قبضو برداشت نہ ڪنداسين. اياز لطيف پليجي چيو تہ درياھ سنڌ تي نون ڪئنالن جي منصوبي کي رد ڪريون ٿا. حڪمران ذاتي مفادن جي لاءِ پاڪستان جي وفاق ۽ مستقبل سان کيڏڻ بند ڪن. شھباز شريف ۽ وفاقي حڪومت سنڌ کان لاتعلق آھن. عمران خان اقتدار ۾ ھو سنڌ کان لاتعلق ھو. پيپلز پارٽي کي اقتدار تي مسلط ڪندڙ طاقتون سنڌ سان گڏ پاڪستان کي بہ ديوار سان لڳائي رھيون آھن. ايازلطيف پليجي چيو تہ سنڌو درياھ ۾ پاڻي ناھي. ڀٽي صاحب جي دور ۾ چشما جھلم ۽ تونسا ڪئنال ٺاھيا ويا. وري پ پ حڪومت ٿل ڪئنال ٺاھيو. انھن ڌاڙيل ڪئنالن ذريعي سنڌ جو 12 مھينا پاڻي چوري ڪيو وڃي ٿو. ھاڻ وري آصف زرداري بلاول کي وزيراعظم بنائڻ لاءِ درياھ جي قيمت ڏني آھي. 6 ڪئنال ٺاھي سنڌو درياھ جو رخ چولستان ڏانھن ڪيو پيو وڃي. اھي ڪئنال ٺھي ويا تہ پاڻ سڀ پاڻي ڦڙي لاء سڪي وينداسين. فصل ڪو نہ ٿيندا. باغ ختم ٿي ويندا. پيئڻ لاءِ تہ ٺھيو غسل جيترو پاڻي بہ ڪونه ملندو. سنڌ جي زمينن جا سودا ڪيا پيا وڃن. بدلي ۾ ڪرپشن ۽ اقتدار کي تحفظ ڏئي سنڌ جي دولت لٽي آھي. سنڌو درياھ اسان جي ھزارين سالن جي تھذيب آھي. حڪمران درياھ کپائي رھيا آھن ۽ اقتدار خريد ڪري رھيا آھن. سنڌ جا ماڻھو ھرگز پنھنجو درياھ کپائڻ نہ ڏيندا ۽ ھر قيمت تي درياھ جو تحفظ ڪندا.اياز لطيف پليجي چيو تہ سنڌيو پنھنجي بربادي کي روڪيو. سنڌو درياھ کي بچايو. 6 ڪئنالن کي روڪيو. سنڌ دشمن منصوبن خلاف اياز لطيف پليجي جو ساٿ ڏيو. ڪارپوريٽ فارمنگ منصوبو قاتل منصوبا آھن. سنڌ شمن منصوبا آھن. پيپلز پارٽي حڪومت کي سنڌ سان ڪو بہ پيار ناھي ۽ نہ ئي شھيدن سان پيار آھي. ھن کي اقتدار ۽ پئسي سان پيار آھي. ان لاء ھو درياھ وڪڻي رھيو آھي. سنڌ جي زمينن تي قبضي جي سازش کي روڪيو. اسان کي تباھي ۽ بربادي جا منصوبا قبول ناھن. اياز لطيف پليجي چيو تہ پيپلزپارٽي نواز ليگ سنڌو درياھ مان 6 نوان ڪئنال ڪڍي ۽ سنڌ جون لکين ايڪڙ زمينون مختلف ڪمپنين کي ڏئي سنڌي ماڻهن جي نسل ڪشي ڪرڻ چاھين ٿيون. سنڌو درياھ تي حملو ڪندڙن سان پيپلزپارٽي گڏ آھي سنڌو درياءَ مان 6 نوان ڪئنال ڪڍڻ سان سنڌ بنجر ٿيڻ سان گڏ ڏڪار جو شڪار ٿي ويندي ۽ جر جو پاڻي زھريلو ٿي ويندو. سمنڊ لاڙ جي ضلعن کي مڪمل ڳڙڪائي ويندو. سنڌ جون نياڻيون جيستائين زنده آھن تيستائين پنهنجي سنڌو درياھ ۽ زمينن تي قبضو ٿيڻ ھرگز نہ ڏينديون. پيپلزپارٽي چاھي ٿي تہ سنڌي ماڻهو خوشحال ٿيڻ بدران اسان جا غلام ھجن پيپلزپارٽي پنهنجي 17 سالن جي اقتداري دور دوران سنڌ کي مصيبتن کان سواءِ ڪجھ بہ نہ ڏنو آهي. اياز لطيف پليجي چيو تہ وفاقي حڪومت ۽ سنڌ حڪومت گڏجي سنڌ دشمن منصوبا جوڙي رھيا آھن. 6 ڪئنال ڪڍي ھميشه لاء سنڌو درياھ کي بند ڪيو ويندو. شھباز شريف ڪا نئين يونيورسٽي ڇو نٿو سنڌ ۾ ٺاھي. ڪا نئين اسپتال، ڪو صنعتي زون ڇو نٿو سنڌ ۾ قائم ڪري جنھن جو سنڌ کي فائدو ٿئي. سنڌ جي پاڻي تي ڌاڙي لاءِ ڪئنالن ۽ زمينن تي قبضن لاءِ ڪارپوريٽ فارمنگ جي نالي ۾ حملو ڪيو پيو وڃي. اياز لطيف پليجي چيو تہ پاڪستان ۾ شامل ٿيڻ کانپوءِ سنڌ سان دوکا ڪيا پيا وڃن. جعلي اليڪشن ڪري ھر ڀيري ڪرپٽ ماڻھو ۽ سوديبازي ماڻھو اقتدار ۾ آندا وڃن ٿا. ھن وقت اچ پچ سنڌ نازڪ دؤر مان پئي گذري. سنڌو درياھ تي ڌاڙو ھڻڻ نہ ڏينداسين. اياز لطيف پليجي چيو تہ سنڌ دشمن ڪئنال ٺھيا تہ سنڌ جو پاڻي بند ٿي ويندو. 10 سالن کانپوءِ سنڌ بنجر ٿي ويندي. ارسا پاڻي چوري ۾ سھولتڪار آھي.اياز لطيف پليجي چيو تہ سنڌيو پنھنجي ايندڙ مستقبل جا سوال آھي. جيڪڏھن درياھ ھليو ويو ته تاريخ ۾ مجرم بنجي وينداسين. لاڙڪاڻو ۽ سکر ڊويزن جي ضلعن ۾ ڌاڙيل ماڻھو اغوا ڪري وڃن ٿا. ميرپورخاص، بدين، سجاول، ٽنڊو محمد خان، ٺٽو ۽ ٻيا ضلعا منشيات فروشن ۽ ڏوھارين جي رحم ۽ ڪرم تي آھن. سنڌ کي پنھنجي حصي جو پاڻي نٿو ملي. ڪوٽڙي کان ھيٺ واري پئي اڏامي. سمنڊ لکين ايڪڙ زمين ڳيھي رھيو آھي. سنڌو درياھ ھزارين سالن کان اسان جي جياپي جو ذريعو آھي. حڪمران اسان کي قتل ڪرڻ چاھين ٿا. تڙپائي تڙپائي مارڻ چاھين ٿا. اسين مرڻ بدران سنڌ دشمن ڪئنال ٺاھڻ نہ ڏينداسين.پيادل مارچ جون قراردادون، سمنڊ ۾ 20 ملين ايڪڙ فوٽ پاڻي جو ڇوڙ ڪري تمر جا ٻيلا ۽ ڊيلٽا کي بچايو وڃي. 1991ع جي ٺاھ تي عمل ڪري سنڌ کي حصي جو پاڻي ڏنو وڃي. سنڌ ۾ بي زمين ھارين ۽ ھارياڻين کي 50-50 ايڪڙ زمين ڏئي مفت زرعي ٻج ۽ ڀاڻ ڏنو وڃي چشمه جھلم لنڪ ڪئنال، تونسا پنجند لنڪ ڪئنال ۽ ٿل ڪئنال سميت سمورا ڌاڙيل واھ بند ڪري سنڌو درياھ مان پاڻي چوري بند ڪئي وڃي. چولستان جي 60 لک ايڪڙ زمين آباد ڪرڻ لاءِ سنڌو درياهه مان غير قانوني طور 6 نوان ڪينال ڪڍڻ وارو فيصلو فوري طور واپس ورتو وڃي. ارسا ايڪٽ 1992 ۾ صدارتي آرڊيننس وسيلي ڪيل ترميم 1973 واري پاڪستان جي آئين جي آرٽيڪل 154 ۽ 155 جي سنگين خلاف ورزي آهي. پاڻي سان لاڳاپيل معاملا گڏيل مفادن واري ڪائونسل جو اسم آهن، انهي معاملي تي ايڪنڪ يا ڪنھن بہ ٻئي فورم ۾ ڪيل فيصلا 1973 واري آئين جي لتاڙ آهن. اهڙا غير آئيني فيصلا ڪندڙ ملڪ دشمن قوتن خلاف آئين جي آرٽيڪل 6 تحت ڪارروائي ڪري سنگين غداري جا ڪيس داخل ڪيا وڃن ۽ ارسا ايڪٽ ۾ ڪيل غير آئيني ترميم فوري طور واپس ورتي وڃي. ڪوھستان جي زمين کي ناقبول قرار ڏئي ان تي قبضا بند ڪيا وڃن. ڪوھستان جي ڳوٺن کي پڪو ڪري اتي جي زمين ھارياڻين ۽ ھارين کي ڏني وڃي.دراوت ڊيم جي ڀرسان رھندڙ قديمي ڳوٺاڻن کي بيدخل ڪرڻ ۽ انھن کان زمينون ڦرڻ جي سازش بند ڪئي وڃي.ڪوٽڙي کان هيٺ سمنڊ ۾ پاڻي نہ ڇڏڻ سبب ٺٽي، سجاول ۽ بدين ضلعن جون لکين ايڪڙ زمينون سمنڊ کائي ويو آهي، تمر جا ٻيلا ختم ٿي ويا آهن، مڇي ماري روزگار ڪندڙ لکين ملاح، سامونڊ پٽي جا رهواسي، ھاري، هارياڻيون ۽ آبادگار پنهنجي گهرن کان محروم ٿي ويا آهي، سندن روزگار تباهه ٿي ويا آهن. انهن سمورن متاثرن کي معاوضو ڏنو وڃي، بي گهر ماڻهن کي گهر ڏنا وڃن ۽ ڪوٽڙي کان هيٺ گهربل پاڻي جو مقدار ڇڏيو وڃي.قومي عوامي تحريڪ مطالبو ٿي ڪري تہ وفاقي سرڪار سنڌ جي وسيلن کي نيلام ڪرڻ جو سلسلو بند ڪري، سنڌ جا وسيلا سنڌي قوم جي ملڪيت آهن. پيپلز پارٽي جي سنڌ سرڪار اغوا انڊسٽري ۽ قبائلي جرڳن کي هٿي ڏئي سکر ۽ لاڙڪاڻو ڊويزن جي ضلعن کي ڌاڙيل اسٽيٽ ۾ تبديل ڪري ڇڏيو آهي. حيدرآباد، نوابشاھ، ميرپورخاص، ڪراچي ڊويزن جي ضلعن ۾ بدامني لاقانونيت جو راڄ آھي، سنڌ جي پرامن شھرين اقليتن کي پنهنجي پاليل ڌاڙيلن ھٿان يرغمال بنايو ويو آھي، منشيات فروش ضلعي جي انتظاميه ۽ بااثر حُڪمران ڌُر جي نگراني ۾ سرعام منشيات جو ڪُڌو ڪاروبار ڪري رھيا آھن.ڪرپشن ۾ ملوث وزيرن ۽ ڪامورن کي گرفتار ڪري لٽيل پئسو واپس ڪيو وڃي.پريا ڪماري سميت سمورن مغوين کي فوري طور بازياب ڪرائي، اغوا ڪندڙ ڌاڙيلن ۽ انهن جي سرپرست سرڪاري سردارن کي قانون جي ڪٽهڙي ۾ آندو وڃي، شهيد جان محمد مهر، شهيد نصرالله گڏاڻي سميت سمورن صحافين جي قاتلن کي گرفتار ڪيو وڃي۔سنڌ ۾ عورتن مٿان قيامت برپا ڪئي وئي آهي. ڪارو ڪاري، سڱ چٽي، بدي جي شادي، ننڍي عمر جي شادي، ھراسمينٽ، بليڪ ميلنگ، زوري شادي، نياڻين مٿان تشدد جهڙا واقعا روز جو معمول بڻيل آهن. سنڌ حڪومت ۽ پوليس ڏوهارين جي ساٿاري بڻيل آهي. عورتن کي تحفظ فراهم ڪرڻ لاءِ قانونسازي ڪري ان تي سختي سان عمل ڪيو وڃي. عورتن جي مسئلن جي حل لاءِ يونين ڪائونسل سطح تي ڪميٽيون ٺاهي، انھن ۾ علائقائي عورتن کي نمائندگي ڏني وڃي. وومين پروٽيڪشن سيل ۽ اينٽي ھراسمينٽ سيل ناڪاره بڻيل آهن. اهڙن ادارن کي فعال بڻائي انهن ۾ ايماندار آفيسر مقرر ڪيا وڃن. سنڌ جي تھذيبي، ثقافتي ۽ تاريخي ماڳن مڪانن تي قبضا ڪري کين تباھ ڪيو پيو وڃي، ڪارونجھر، گورک، کير ٿر، اروڙ، گنجي ٽڪر، ڪينجھر، منڇر، ھاليجي، نيشنل پارڪ، ڀنڀور، موئن جو دڙو، مومل جي ماڙي سميت سمورن تاريخي ماڳن مڪانن تي قبضا ڪيا پيا وڃن، تاريخي ماڳ ميساري سنڌ جي ثقافت تي حملو ڪيو ويو آهي، اڄوڪي ھن اي پي سي ۾ مطالبو ٿو ڪجي ته سنڌ جي تاريخي تھذيبي ۽ ثقافتي ورثن کي بچائڻ لاء خاص اپاءُ وٺي قبضا ختم ڪرايا وڃن.قومي عوامي تحريڪ وچن ٿي ڪري تہ سنڌ ۽ سنڌو درياء جي تحفظ لاء پنهنجي قائد محترم اياز لطيف پليجو جي اڳواڻي ۾ قومي عوامي تحريڪ ۽ ٻين سڀني سنڌ دوست، قومپرست، پروگريسو ۽ عوام دوست پارٽين سان گڏجي ماضي جيان ڀرپور جدوجهد ۽ اثرائيتو ڪردار ادا ڪندي رهندي ۽ سنڌ، عوام ۽ درياء جي دشمن کي شڪست فاش ڏيندي۔ جلسي کي ممتاز شيخ، اشرف پليجو ،ياسر جاکرو، اشفاق چنڙ ۽ ٻين خطاب ڪيو