دي چينج آرگنائيزيشن ۽ اسپورٽ اينڊ يوٿ ڊپارٽمنٽ سنڌ حڪومت طرفان ٻہ ڏهاڙن واري نيشنل پرائيڊ ڪرڪيٽ چيمپيئن شپ حيدرآباد ۾ منعقد

پهرين ڏينهن ڪوھسار لائنز، اقبال ڪلب ۽ پاڪ پينٿرز فاتح رهيون. ٻئي ڏينهن ڪوھسار لائنز ۽ اقبال ڪلب فائنل ۾ پهتا

حيدر آباد؛ دي چينج آرگنائيزيشن ۽ اسپورٽ اينڊ يوٿ ڊپارٽمنٽ سنڌ حڪومت طرفان ٻہ ڏهاڙن واري نيشنل پرائيڊ ڪرڪيٽ چيمپيئن شپ حيدرآباد ۾ منعقد ڪئي وئي. ٽورنامنٽ ۾ 8 ٽيمون شامل هيون جن ۾ ڪوھسار لائنز، رائزنگ اسٽار، الازيد ڪلب، پاڪ پينٿرز، اقبال ڪلب ۽ هوڪس ڪرڪيٽ ڪلب شامل هيون. پهرين ڏينهن ڪوھسار لائنز، اقبال ڪلب ۽ پاڪ پينٿرز فاتح رهيون. ٻئي ڏينهن ڪوھسار لائنز ۽ اقبال ڪلب فائنل ۾ پهتا. فائنل ۾ ڪوھسار لائنز اقبال ڪلب کي شڪست ڏئي سوڀ ماڻي ورتي ٽورنامنٽ جي پڄاڻي تي سٺي ڪارڪردگي ڏيکاريندڙ رانديگرن ۽ ٽيمن ۾ ٽرافيون ۽ انعام ورهايا ويا. ڪوھسار ڪلب کي فائنل کٽڻ تي ونر جي ٽرافي، جڏهن ته اقبال ڪلب کي رنر اپ ٽرافي ڏني وئي. ڪوھسار ڪلب جي ڪپتان فراز خان بهترين ڪارڪردگي ڏيکاري پليئر آف دي ٽورنامنٽ جو اعزاز حاصل ڪيو ۽ ٻين رانديگرن کي ميڊل ڏنا ويا. اختتامي تقريب ۾ خاص مهمان ڊگري ڪاليج جي پرنسپال سر عطاء الله چيو ته ڪرڪيٽ جي ترقي لاءِ اهڙا ٽورنامنٽ وڌيڪ ٿيڻ گهرجن، ڇو ته ان سان رانديگرن کي پنهنجي راند بهتر ڪرڻ ۾ مدد ملي ٿي. جڏهن ته ڊي پي سر شاهد ولي چيو ته اهڙا ٽورنامنٽ ٿيڻ سٺو سنوڻ آهي مسقبل ۾ به اهڙا ايونٽ ٿيڻ گهرجن، جنهن سان اهي ڇوڪرا اڳتي هلي پاڪستان يا ڪنهن سٺي ٽيم لاءِ راند ڪري سگهن ٿا. رانديگرن دي چينج آرگنائيزيشن ۽ سنڌ حڪومت جا ٿورا مڃيندي چيو ته اسان کي اهڙا ٽورنامنٽ کيڏڻ جا موقعا ملندا. شائقين به خوشي جو اظهار ڪيو ۽ چيو ته حيدرآباد ۾ اهڙا ايونٽ ڏسي کين سرهائي ٿي.