بدامني، لاقانونيت، ڀُنگ لاءِ اغوا وارن واقعن کان سنڌ جو عوام تنگ اچي چڪو آهي: محمد حسين محنتي

256 views | 02nd Jul 2024 • سنڌي خبرون

بدامني، لاقانونيت، ڀُنگ لاءِ اغوا وارن واقعن کان سنڌ جو عوام تنگ اچي چڪو آهي: محمد حسين محنتي

بدامني، لاقانونيت، ڀُنگ لاءِ اغوا وارن واقعن کان سنڌ جو عوام تنگ اچي چڪو آهي: محمد حسين محنتي

ڪراچي (رپورٽر) جماعت اسلامي سنڌ جي امير ۽ اڳوڻي ايم اين اي محمدحسين محنتي ڊي جي رينجرز سنڌ ميجر جنرل اظهر وقاص سان سندن آفيس ۾ ملاقات ڪئي ۽ کيس ڪراچي کان ڪشمور تائين امن امان جي بدتر صورتحال تي پنهنجي ڳڻتي جو اظهار ڪندي چيو ته بدامني، لاقانونيت، ڀُنگ لاءِ اغوا وارن واقعن کان سنڌ جو عوام تنگ اچي چڪو آهي، قبيلائي جهيڙا ناسور بڻجي چڪا آهن جن جي ڪري بدامني ۾ اضافو ۽ عام ماڻهن جي زندگي عذاب بڻجي چڪي آهي، ڪچي جي علائقي ۾ ڌاڙيلن جون پناهه گاهون موجود آهن جتي سڄي ملڪ مان واپارين، هندو برادري جي ماڻهن سميت عورتن توڙي ٻارن کي اغوا ڪري وڊيوز وائرل ڪري سندن وارثن کان ڪروڙين رپيا ڀنگ جي رقم طلب ڪئي وڃي ٿي، ظالم سردار، پوليس ۽ مقامي انتظاميه ڌاڙيلن جي سهولتڪار بڻيل آهي، جڏهن ته شهرن خاص طور تي ڪراچي ۾ اسٽريٽ ڪرائم جو جن بي قابو ٿي چڪو آهي، رڳو ڪجهه مهينن دوران 80 کان وڌيڪ ماڻهو ڦُر دوران مزاحمت تي قتل ٿي چڪا آهن ٻين شهرن جو داستان الڳ آهي. معصوم نياڻيءَ پريا ڪماري، فضيلا سرڪي کي اغوا، صحافي جان محمد مهر ۽ نصرالله گڏاڻي کي قتل ڪري سنڌ جي ڌرتيءَ کي صحافين لاءِ مقتل گاهه بڻيايو ويو آهي، نياڻين کي بازياب ۽ صحافين جي قاتلن کي اڃان تائين گرفتار ناهي ڪيو ويو، ان ڪري ڏوهارين ۽ سندن سهولتڪاري جو ڪردار ادا ڪرڻ وارن سڀني بااثر ماڻهن خلاف بنا ڪنهن مت ڀيد جي نتيجو ڏيندڙ بي رحم ۽ ڀرپور آپريشن ڪري سنڌ ۾ امن امان بحال ڪيو وڃي ته جيئن ماڻهو سُک جو ساهه کڻي سگهن. ڊي جي رينجرز ميجر جنرل اظهر وقاص صوبائي امير کي يقين ڏياريو ته رينجرز پوليس سان گڏجي ڪري سنڌ ۾ امن قائم ۽ شهرين جي جان توڙي مال جي حفاظت ڪرڻ لاءِ پنهنجو ڀرپور ڪردار ادا ڪيو آهي ۽ آئنده به ڪندي رهندي. ڪچي ۾ پوليس جا 34 ٿاڻا ويران هئا جن کي ٻيهر بحال ڪري پوليس فورس مقرر ۽ ڪيترن ئي معصوم جانين کي بچايو آهي.#