گڏاپ ۾ مختلف ڳوٺن جي رھواسين جو فارم ھائوس مالڪن خلاف احتجاج

views | 13th Dec 2023 • سنڌي خبرون

گڏاپ ۾ مختلف ڳوٺن جي رھواسين جو فارم ھائوس مالڪن خلاف احتجاج

گڏاپ ۾ مختلف ڳوٺن جي رھواسين جو فارم ھائوس مالڪن خلاف احتجاج

گڏاپ (رپورٽر)ڪراچي ناردرن بائي پاس گڏاپ ٽائون ٿاڻي جي حد ۾ فارم هائوس ۾ ايندڙ ماڻھوشراب جي نشي ۾ ڌت ٿي رات جو هوائي فائرنگ ڪري وڏي آواز ۾ ايڪو سائونڊ تي گانا ھلائڻ لڳا. فائرنگ سبب آس پاس جي رهواسين ۾ خوف واري صورتحال پيدا ٿي وئي. شڪايتن باوجود گڏاپ پوليس فارم هائوس مالڪن خلاف ڪا به ڪارروائي نه ڪئي. يو سي 8 شاھ مريد گڏاپ ٽائون جي مختلف ڳوٺن علي محمد گبول. يوسف رند ڳوٺ. حاجي رمضان واڍيلو ڳوٺ. دريا خان سهتاڻي ڳوٺ. حاجي عرس سهتاني ڳوٺ. حاجي فيض محمد سهتاني ڳوٺ. بابو پاتاڻي ڳوٺ جي رھواسين محمد اصغر پتاڻي. حاجي بشير سهتاڻي. نواز علي مري. اقبال خاصخيلي. ياسين مري. حاجي منشي. راهب گبول. رشيد سهتاني. رجب گبول. اسلم گبول ۽ ٻين ويسٽ پريس ڪلب پهچي فارم هائوس مالڪن ۽ گڏاپ ٽائون پوليس خلاف احتجاجي مظاهرو ڪيو. ان موقعي تي مظاهرين ميڊيا سان ڳالهائيندي چيو ته فارم هائوس ۾ ايندڙ شهرين اسان جو جيئڻ جنجال ڪري ڇڏيو آهي. اسان کي رات جو سڪون سان ننڊ به نٿا ڪري سگھون. رات جو روزاني اسان جي گهرن مٿان هوائي فائرنگ ڪئي پئي وڃي. پوري رات وڏي آواز ۾ گانا وڄايا وڃن ٿا، جن جي ڪري اسان جا معصوم ٻارڙا سڪون سان لکي ۽ پڙھي به نٿا سگھن. هنن چيو ته اسان جي علائقن ۾ قائم ٿيل وائيٽ ولا فارم هائوس. رجهاني فارم هائوس. سر سپاٽا فارم هائوس. موج مستي فارم هائوس. ھلا گلا فارم هائوس. سن رائز فارم هائوس جي مالڪن کي به شڪايتون ڪيون آهن پر هو ٻڌڻ لاءِ تيار نه آهن. هنن چيو ته اسان گڏاپ ٽائون ٿاڻي ۾ اهڙن فارم ھائوسن ۾ ايندڙ ماڻهن پاران فائرنگ ۽ ايڪو سائونڊ جون شڪايتون پڻ گڏاپ ٽائون ٿاڻي تي داخل ڪرايون آهن پر پوليس ڪا به ڪارروائي ڪرڻ لاءِ تيار ناهي. هن آءِ جي سنڌ. ايس ايس پي ملير. ڊي ايس پي گڏاپ ٽائون کان مطالبو ڪيو آهي ته فوري طور تي فارم هائوس مالڪن خلاف قانوني ڪارروائي ڪري اسان کي سڪون سان زندگي گذارڻ جو حق ڏنو وڃي. ٻي صورت ۾ اسين مجبورن نادرن باءِ پاس تي احتجاجي مظاهرو ڪنداسين