ٺٽي ۾ روينيو ملازمن خلاف انتقامي ڪارروائيون شروع ٿيڻ خلاف احتجاجي مظاھرو

متاثر ملازمن پاران ڊي سي آفيس ٺٽو سميت ضلعي جي سمورين آفيسن جي تالا بندي ڪئي وئي

ٺٽو( محمد شفيق ڀٽي) نگران حڪومت شروع ٿيندي ئي ڊي سي ٺٽو پاران روينيو کاتي ضلعي ٺٽي جي ملازمن خلاف انتقامي ڪاروايون شروع ڪري ڇڏيون، ملازم سراپا احتجاج بڻيل، متاثر ملازمن پاران ڊي سي آفيس ٺٽو سميت ضلعي جي سمورين افيسن جي تالا بندي ڪري قلم ڇڏ ھڙتال ڪري ٻانھن تي ڪاريون پٽيون بڌي ڊي سي آفيس مڪلي جي احاطي ۾ بک ھڙتالي ڪئمپ قائم ڪري جائز مطالبا حل ڪرڻ جي گھر ڪئي پئي وڃي، ان سلسلي ۾ آل روينيو سنڌ ايمپلائيز ايسوسيئشن ۽ سنڌ تپيدار ايسوسيئشن ضلعي ٺٽي پاران پنھنجي جائز مطالبن جي مڃتا توڙي ڊي سي ٺٽو پاران ملازمن خلاف شروع ڪيل انتقامي ڪاروائين واري عمل خلاف روينيو کاتي جي سمورن ملازمن پاران سمورين آفيسن جي تالا بندي ڪري ٻانھن تي ڪاريون پٽيون ٻڌي ڊي سي آفيس مڪلي جي احاطي ۾ بک ھڙتالي ڪئمپ ملازم اڳواڻن فھد ٻٻر، رياض شاھ، سڪندر منگسي، غلام نبي ملاح، رياض آرائين، اسماعيل جتوئي، سلطان جمالي، حسن ناريجو، آصف بلوچ، وسيم جان جوکيو، علي شير سومرو جي اڳواڻي ۾ قائم ڪندي چيو آھي تہ نگران حڪومت شروع ٿيندي ئي نگران حڪومت پاران مقرر ٿيل ڊي سي ٺٽو روينيو کاتي جي ملازمن خلاف انتقامي ڪاروايون شروع ڪري سندن جيئڻ جنجال بنائي ڇڏيو اھي، حق جو آواز بلند ڪرڻ تي ٻن تپيدارن غلام نبي ملاح ۽ علي اڪبر گوپانگ کي بدلي ڪرڻ سميت ٻين بہ ڪيترن ئي تپيدارن جون جبري بدليون ڪري کين پريشان ڪيو پيو وڃي تہ ٻئي طرف ضلعي ٺٽي جي روينيو کاتي جي ننڍن ملازمن لوئر اسٽاف کي ڪي بہ سھولتون ميسر ناھن، مٿان وري ٺٽي ضلعي ٺٽي جي روينيو کاتي جي ملازمن جا اڃان تائين پروموشن ٿي ناھن سگھيا، ملازم اڳواڻن فھد ٻٻر، سڪندر منگسي ۽ ٻين وڌيڪ چيو تہ روينيو ڪالوني مڪلي ۾ ملازمن بجاء ٻين ماڻھن جو قبضو برقرار آھي، روينيو کاتي جي ملازمن جي رھائشي ڪالوني لاء مڪلي تي مختص ٿيل پلاٽ تي بہ قبضا ڪيا ويا آھن، ڊي سي آفيس مڪلي ۾ قائم ڪيل برانچن ۾ مقرر ٿيل ملازمن کي پيئڻ جي صاف پاڻي، اسٽيشنري سميت ڪابہ سھوليت ميسر ناھي، تپيدارن جون جبري بدليون ٿيڻ توڙي ڪوٽارن جي کوٽ ڪري بہ کين ڪم ڪرڻ ۾ سخت مشڪلاتون پيش اچي رھيون آھن، پي سندن تڪليفن ڏانھن ڪير بہ ڌيان ڏيڻ لاء تيار ناھي، ھنن نگران سنڌ حڪومت جي وڏي وزير سميت روينيو کاتي جي صوبائي وزير کان مطالبو ڪيو تہ فورن سندن جائز مسئلا حل ڪري کين ڊي سي ٺٽو جي انتقامي ڪاروائين مان نجات ڏياري ننڍن ملازمن لوئر اسٽاف جا پروموشن ڪري روينيو ڪالوني مڪلي تي ٻين ماڻھن جا ٿيل قبضا خالي ڪرائي اھي جايون روينيو کاتي جي ملازمن جي نالي تي الاٽ ڪري ڊسٽرڪٽ جيل ٺٽو ڀرسان روينيو کاتي جي ملازمن لاء مختص ٿيل پلاٽ تان قبضوہخالي ڪرائي ڪلرڪن، اسسٽنٽ ۽ تپيدارن جون جبري بدليون واپس ڪرائي ڊي سي آفيس ٺٽو جي ھر برانچ جي ملازمن کي پيئڻ جي صاف پاڻي ۽ اسٽيشنري مھيا ڪري ملازمن جا سمورا جائز مسئلا حل ڪيا وڃن، ٻئي صورت ۾ مسئلن جي حل ٿيڻ تائين سندن احتجاج جاري رھندو. احتجاجي ڪئمپ تي پ ٽ الف ۽ آپڪا جا اڳواڻ محمد شريف تنيو، راجو قريشي ۽ ٻين پھچي متاثر ملازمن سان يڪجھتي جو اظھار ڪري ساڻن ساٿ ڏيڻ جو کين يقين ڏياريو.