شڪارپور ۾ پوليس ۽ رينجرز جو گڏيل آپريشن، لکين روپين جي منشيات ھٿ

گرينڊ آپريشن دوران 60 لک روپين جي ماليت جي منشيات هٿ ڪئي وئي آهي: ايس ايس پي

شڪارپور (احسان ابڙو) بدنام زمانه چڻگي مقام تي منشيات فروشن ۽ انهن جي ٺڪاڻن تي پوليس ۽ رينجرز جو گڏيل گرينڊ آپريشن. گرينڊ آپريشن دوران 60 لکن جي ماليت جي منشيات هٿ ڪئي وئي آهي هٿ آيل منشيات ۾ وڏي مقدار ۾ چرس ڀنگ شامل ۽نقلي ڀاڻ جي فيڪٽري مان ڪيميڪل به هٿ ڪيو ويو آهي. گرينڊ آپريشن ايس ايس پي شڪارپور خالد مصطفيٰ ڪورائي ۽ رينجرز جي ڪرنل جي اڳواڻي ۾ ڪيو ويو. ايس ايس پي شڪارپور جو چوڻ آھي تھ آپريشن ۾ اي ايس پي سٽي سيد فاضل شاه بخاري سميت ايس ڊي اوز ، مختلف ٿاڻن جي ايس ايڇ اوز ۽ رينجرز اهلڪارن شرڪت ڪئي. آپريشن دوران چڻگي ۾ بدنام ڏوهاري منشيات فروش قبرستان ۾ قائم منشيات جا اڏا ڊاهي پٽ ڪيا ويا. آپريشن دوران 15 کان وڌيڪ گهرن جي تلاشي ورتي وئي، جنهن دوران 5 شڪي ماڻهن کي حراست ۾ وٺي جاچ لاءِ کين ٿاڻي تي منتقل ڪيو ويو. آپريشن دوران زمين جي اندر لڪايل منشيات هٿ ڪئي وئي. هٿ آيل منشيات ۾ 60 لک رپين کان وڌيڪ جي چرس ۽ ڀنگ شامل آهي. منشيات فروش گذريل ڪيترن ئي سالن کان هن قديم قبرستان تي قبضو ڪري منشيات جو ڪاروبار هلائي رهيا هئا. ڪارروائي دوران جعلي ڀاڻ ٺاهڻ واري فيڪٽري پڪڙيو ويو. جعلي ڀاڻ جي فيڪٽري کي سيل ڪري سامان، پيڪنگ ۽ مشينري ضبط ڪئي وئي آهي. منشيات فروش سماج لاءِ خطرو آهن، انهن خلاف ڪريڪ ڊائون جاري رکيو ويندو جيستائين منشيات جو خاتمو نه ٿيندو. فرار ٿيل جوابدارن جي ڳولا جاري آهي، جن کي جلد گرفتار ڪيو ويندو.