احتجاج جو نتيجو: لطيف يونيورسٽي خيرپور ۾ آفيسرز ۽ ايمپلائيز ايسوسيئيشنز جا اڳواڻ معطل

آفيسر ايسوسيئيشن جو سيد منير شاھھ ۽ ملازم ايسوسيئيشن جو حاڪم ڦلپوٽو معطل

خيرپور(ڊ ر) شاهه عبداللطيف يونيورسٽي خيرپور جي رجسٽرار هڪ حڪم نامو جاري ڪندي يونيورسٽي جي ملازم ۽ ايمپلائيز ويلفيئر ايسوسيئيشن جي اڳواڻ حاڪم ڦلپوٽو ۽ آفيسرز ايسوسيئيشن جي جنرل سيڪريٽري سيد منير شاهه کي معطل ڪري سندن خلاف چار رڪني انڪوائري ڪاميٽي جوڙي ورتي نوٽيفڪيشن ۾ ڄاڻايو ويو آهي ته حاڪم ڦلپوٽو ۽ سيد منير شاھه کي يونيورسٽي جو ماحول خراب ڪرڻ، غير حاضر رهڻ، نافرماني ڪرڻ، سوشل ميڊيا، پرنٽ ۽ اليڪٽرانڪ ميڊيا ذريعي يونيورسٽي جي ساک خراب ڪرڻ تي معطل ڪيو ويو آهي ٻنهي ملازمن کي معطل ڪري پروفيسر ڊاڪٽر نور احمد شيخ، پروفيسر ڊاڪٽر محمد مسيح الله جتوئي، محمد حسن هاليپوٽو ۽ سڪندر علي جانوري تي مشتمل جاچ ڪاميٽي جوڙي وئي آهي جوڙيل ڪاميٽي ستن ڏينهن اندر جاچ مڪمل ڪري رپورٽ انتظاميا حوالي ڪندي ٻئي پاسي آفيسر ويلفيئر ايسوسيئيشن جي صدر محمد مراد پيرزادو جو چوڻ آهي ته اسان انتظاميا جي اهڙن حربن کان ڊڄڻ وارا ناهيون انتظاميا اهڙيون حرڪتون نه ڪري ته بهتر آهي ھن چيو ته اسان آفيسر ويلفيئر ايسوسيئيشن جي جنرل سيڪريٽري سيد منير شاھ راشدي سميت ايمپلائيز ويلفيئر ايسوسيئيشن جي صدر حاڪم ڦلپوٽو کي معطل ڪرڻ واري عمل جي سخت لفظن ۾ مذمت ڪريان ٿو آفيسرز ايسوسيئيشن ۽ ايمپلائيز ويلفيئر ايسوسيئيشن جي عهديدارن جو اجلاس جاري آهي ۽ سڀاڻي جو لائحه عمل تيار ڪيو پيو وڃي ھن چيو ته يونيورسٽي انتظاميا ملازمن جا جائز مسئلا حل ڪرڻ بدران استاد ۽ ملازم دشمنيءَ تي لهي آئي.