سھراب ڳوٺ ٽائون ۾ پاڻي مافيا غير قانوني 85 کان وڌيڪ کوھ کوٽرائي ڇڏيا آھن: رمضان بليدي

219 views | 03rd Sep 2023 • سنڌي خبرون

کوهن جي سرپرستي واٽر بورڊ جا راشي آفيسر علائقي پوليس ۽ سياسي پارٽي جا ماڻھو ڪري رھيا آھن

گڏاپ (رپورٽر)سھراب ڳوٺ ٽائون ۾ پاڻي مافيا غير قانوني 85 کان وڌيڪ کوھ کوٽرائي ڇڏيا آھن جنھن جي سرپرستي واٽر بورڊ جا راشي آفيسر علائقي پوليس ۽ سياسي پارٽي جا ماڻھو ڪري رھيا آھن. جيڪي پاڻي مافيا کان لکين روپيه رشوت وٺي خاموش تماشائي بڻيل آهن. اھڙن خيالن جو اظهار سنڌ نيشنل پارٽي جي سينيئر وائيس چيئرمين رمضان بليدي ايس اين پي ھائوس ڪراچي ۾ پريس ڪانفرنس ڪندي ڪيو. رمضان بليدي وڌيڪ چيو ته سھراب ڳوٺ ٽائون جا ماڻھو ھن مھانگائي جي دور ۾ پاڻي جا ٽينڪر خريد ڪرڻ تي مجبور آھن. پاڻي مافيا فضل ڪرم. خالد سيٺ. حمزه ٽيڪسٽائل احمد جمال پاڙو. لاسي ڳوٺ ۽ مڇر ڪالوني ۾ ناجائز غير قانوني کوھ کوٽرائي ڇڏيا آهن. سائيڊ بور لڳڻ ڪري علائقن جي بورن ۾ پاڻي سڪي ويوآهي. گھرن مسجدن ۾ پاڻي جي کوٽ پيدا ٿي وئي آهي. واٽر بورڊ انتظاميه چند پئسن جي لالچ ۾ حمزه ٽيڪسٽائل. خالد سيٺ ۽ فضل ڪريم کي پاڻي جا غير قانوني کوھ کوٽڻ جي اجازت ڏئي ڇڏي آهي. پاڻي جي کوٽ سبب علائقي واسي پاڻي ڍڪ لاء پريشان آهن. ھن چيو ته فضل ڪرم کي لائيسنس خاموش ڪالوني ۾ صرف ڇھ بورن جو مليل آهي. پر فضل ڪرم سھراب ڳوٺ ٽائون ۾ 85 کان وڌہڪ کوھ غير قانوني طور کوٽرائي ڇڏيا آهن ۽ انھن کوھن ۾ مٺي پاڻي جون لائينون لڳايون ويون آهن جنھن خلاف واٽر بورڊ انتظاميا ڪارروائي ڪرڻ لاء تيار ناھي. ھن ميئر ڪراچي. ايم ڊي واٽر بورڊ کي اپيل ڪندي چيوته سھراب ڳوٺ ٽائون جي رھواسين کي پاڻي مافيا جي ظلمن کان بچايو وڃي. ٻي صورت ۾ ھن چتاءُ ڏيندي چيو ته پاڻي مافيا خلاف قانوني ڪارروائي نه ڪئي وئي تہ اسين ايم ڊي واٽر بورڊ جي آفيس جو گھيراء ڪنداسين