ٺٽي، مڪلي ۽ ڀرپاسي اڻ بجلي جي اعلانيل لوڊشيڊنگ خلاف نوجوان روڊن تي نڪري آيا

ٺٽو يوٿ ڊولپمينٽ ويلفيئر آرگنائيزيشن پاران ساجد شيخ، سرفراز ميمڻ ۽ بين جي اڳواڻي ۾ قومي شاھراھھ تي ڌرڻو

ٺٽو (شفيق ڀٽي)ٺٽي، مڪلي ۽ ڀرپاسي وارن علائقن ۾ گذريل ڪيترن ئي ڏينهن کان 18 کان 20 ڪلاڪن تائين جاري اڻ اعلانيل لوڊشيڊنگ ۽ فالٽ جو جواز ڄاڻائي بجلي بند رکڻ خلاف شهرين ۽ نوجوانن جو صبر جواب ڏئي ويو. ٺٽو يوٿ ڊولپمينٽ ويلفيئر آرگنائيزيشن جي اڳواڻن ساجد شيخ، سرفراز ميمڻ، غلام علي جاکرو، ياسر جاکرو، راجا سميع ميمڻ ۽ ٻين جي اڳواڻي ۾ احتجاج ڪندي مڪلي باءِ پاس تي ڪراچي ـ ٺٽو قومي شاهراهه بلاڪ ڪري ڌرڻو هنيو، جنهن سبب ٻنهي پاسن کان ٽرئفڪ معطل ٿي وئي ۽ گاڏين جون ڊگهيون قطارون لڳي ويون. مظاهرين سخت نعريبازي ڪندي "ڳولهي ڏيو، ڳولهي ڏيو، چونڊيل نمائندا ڳولهي ڏيو" جا نعرا پڻ هنيا. احتجاج ۾ ٺٽو شهر جي بخاري محلي، آگر پاڙي، جوڻيجا ڪالوني، پلنگ پاڙي، شاهه گوهر گنج پاڙي سميت مختلف علائقن جا رهواسي وڏي انگ ۾ شريڪ ٿيا. ان موقعي تي اڳواڻن چيو ته شديد گرمي ۾ روزانو 18 کان 20 ڪلاڪ بجلي بند رکڻ سبب ڪاروبار، تعليم، روزگار، پاڻي جي فراهمي ۽ روزمره جي زندگي سخت متاثر ٿي وئي آهي، جڏهن ته گئس، پاڻي ۽ بجلي جهڙين بنيادي سهولتن جي کوٽ سبب شهري سخت عذاب ۾ مبتلا آهن. احتجاج ڪندڙن الزام هنيو ته ٺٽو، مڪلي ۽ ڀرپاسي جي علائقن کي بجلي فراهم ڪندڙ اصحابي فيڊر تي اضافي لوڊ وڌو ويو آهي، جنهن سبب بار بار بريڪ ڊائون ۽ ڊگهي لوڊشيڊنگ ٿي رهي آهي. هنن حيسڪو جي اعليٰ اختيارين کان مطالبو ڪيو ته اصحابي فيڊر تان اضافي لوڊ فوري طور ختم ڪري نئون منظور ٿيل فيڊر جلد فعال ڪيو وڃي ۽ اڻ اعلانيل لوڊشيڊنگ جو خاتمو ڪري شهرين کي رليف فراهم ڪيو وڃي، ٻي صورت ۾ احتجاج جو دائرو وڌيڪ وسيع ڪيو ويندو.