ڊپٽي ڪمشنر ٺٽو سرمد علي ڀاڳت جي صدارت هيٺ اھم اجلاس

روينيو معاملن، رڪارڊ جي ٻيهر لکت ۽ عدالتن ۾ التوا هيٺ ڪيسن بابت غور ويچار

ٺٽو (محمد شفيق ڀٽي)ڊپٽي ڪمشنر ٺٽو سرمد علي ڀاڳت جي صدارت هيٺ سندس آفيس ۾ روينيو سان لاڳاپيل مختلف معاملن، تعلقن ۾ رڪارڊ جي ٻيهر لکت (ري رائيٽنگ) ۽ عدالتن ۾ التوا هيٺ ڪيسن جو جائزو وٺڻ لاءِ هڪ اهم اجلاس منعقد ٿيو.اجلاس ۾ ايڊيشنل ڊپٽي ڪمشنر ون عمران الحق ، اسسٽنٽ ڪمشنرن، مختيارڪارن ۽ لاڳاپيل روينيو آفيسرن شرڪت ڪئي. اجلاس دوران ضلعي جي سمورن تعلقن ۾ جاري رڪارڊ جي ٻيهر لکت جي اڳڀرائي، روينيو سان لاڳاپيل مختلف معاملن ۽ عدالتن ۾ التوا هيٺ ڪيسن جو تفصيلي جائزو ورتو ويو. ڊپٽي ڪمشنر لاڳاپيل آفيسرن کان تعلقي وار ڪارڪردگي رپورٽ طلب ڪندي جاري ڪمن ۾ پيش ايندڙ رڪاوٽن ۽ انهن جي ترت حل بابت پڻ خيال ونڊيو. ڊپٽي ڪمشنر سرمد علي ڀاڳت روينيو آفيسرن کي سختي سان هدايت ڪئي ته رڪارڊ جي ٻيهر لکت جو عمل مقرر وقت اندر مڪمل ڪيو وڃي، روينيو سان لاڳاپيل سمورا معاملا قانون موجب بروقت نبيريا وڃن ۽ عدالتن ۾ التوا هيٺ ڪيسن جي مؤثر پيروي ڪندي انهن کي جلد کان جلد حل ڪيو وڃي. هن وڌيڪ چيو ته روينيو رڪارڊ جي درستگي، شفافيت ۽ بروقت دستيابي عوامي خدمتن جي بهتري لاءِ انتهائي ضروري آهي. ڊپٽي ڪمشنر سڀني آفيسرن کي هدايت ڪئي ته هو پنهنجون ذميواريون مڪمل ايمانداري، پيشاورانه مهارت ۽ ذميواري سان نڀائين، جيئن عوام کي بهتر ۽ بروقت روينيو خدمتون فراهم ڪري سگهجن.