ملير: اسپتال چورنگي ويجهو افسوسناڪ حادثو، 2 ڄڻا حياتيون وڃائي ويٺا

ملير (رپورٽ: عبدالرشيد مورجھريو)اسپتال چورنگي، جنرل ٽائر ڀرسان پيش آيل افسوسناڪ حادثي ۾ ٻه ڄڻا فوت ٿي ويا۔شروعاتي ڄاڻ موجب ٻئي ماڻهو روڊ ڪناري هڪ ٽريلر هيٺ سمهي پيا هئا ته اوچتو ٽريلر ڊرائيور گاڏي هلائي ڇڏي، جنهن سبب ٻئي ڄڻا ٽريلر هيٺ اچي موقعي تي ئي چيڀاٽي فوت ٿي ويا۔ اطلاع ملندي ئي ريسڪيو ٽيمون فوري طور واقعي واري هنڌ پهتيون ۽ لاشن کي پنهنجي تحويل ۾ وٺي ايمبولينس ذريعي جناح پوسٽ گريجوئيٽ ميڊيڪل سينٽر منتقل ڪيو پيو وڃي۔ريسڪيو ذريعن موجب فوت ٿيل ماڻهن جي سڃاڻپ اڃا تائين نه ٿي سگهي آهي، جڏهن ته سندن عمرون لڳ ڀڳ 25 کان 30 ورهين جي وچ ۾ ٻڌايون پيون وڃن۔پوليس واقعي جي وڌيڪ جاچ شروع ڪري ڇڏي آهي، جڏهن ته ٽريلر ڊرائيور جي ڳولا جاري آهي، جيڪو حادثي بعد موقعي تان فرار ٿيڻ ۾ ڪامياب ٿي ويو۔مقامي ماڻهن موجب مذڪوره هنڌ تي رات جي وقت ٽرانسپورٽ گاڏين جي اچ وڃ گهڻي هوندي آهي ۽ ڪيترائي بي گهر ماڻهو روڊ ڪناري يا گاڏين هيٺ پناهه وٺي سمهن ٿا، جنهن ڪري اهڙن حادثن جو خطرو وڌيل رهندو آهي۔شهري حلقن انتظاميا کان مطالبو ڪيو آهي ته اهڙن هنڌن تي حفاظتي قدم کنيا وڃن ۽ بي گهر ماڻهن لاءِ محفوظ پناهه گاهن جو بندوبست ڪيو وڃي ته جيئن قيمتي جاني نقصان کان بچي سگهجي۔