ميمڻ ڳوٺ جي اسپتال ۾ ويم دوران ماءُ ٻار سميت فوت، وارثن جو احتجاج

ڊاڪٽرن ۽ عملي جي غفلت سبب گهرواري ۽ ٻار فوت ٿي ويا: سجاد خاصخيلي

شهناز خاصخيلي ۽ سندس نئين ڄاول پٽ فوت ٿي ويا هئا. وارثن الزام هنيو آهي ته اسپتال جي ڊاڪٽرن ۽ پيرا ميڊيڪل عملي جي مبينا غفلت، غير ذميواراڻي روئي ۽ وقت سر مناسب علاج نه ٿيڻ سبب ماءُ ۽ ٻار پنهنجي حياتي وڃائي ويٺا فوتي عورت جي مڙس سجاد خاصخيلي ٻڌايو ته هن انصاف جي حصول لاءِ ميمن ڳوٺ ٿاڻي ۾ ڪيس داخل ڪرائڻ جي ڪوشش ڪئي، پر سندس چوڻ موجب شروعات ۾ پوليس ڪيس داخل نه ڪيو، جنهن تي وارثن، عزيزن، مائٽن ۽ علائقي جي رهواسين ٿاڻي آڏو احتجاجي مظاهرو ڪري ڌرڻو هنيو مظاهرين مطالبو ڪيو ته واقعي جي شفاف ۽ غيرجانبدار جاچ ڪرائي وڃي ۽ جيڪڏهن ڊاڪٽرن يا اسپتال جي عملي جي غفلت ثابت ٿئي ته ذميوارن خلاف سخت قانوني ڪارروائي ڪئي وڃي، جيئن مستقبل ۾ اهڙن افسوسناڪ واقعن جي روڪٿام ٿي سگهي. ڪيترن ئي ڪلاڪن تائين جاري رهندڙ احتجاج ۽ ڳالهين کانپوءِ پوليس متوفيه جي مڙس سجاد خاصخيلي جي فرياد تي اسپتال جي عورت ڊاڪٽر ۽ لاڳاپيل عملي خلاف ڪيس داخل ڪيو، جنهن بعد مظاهرين پنهنجو ڌرڻو ختم ڪري ڇڏيو پوليس موجب واقعي جي مختلف رخن کان جاچ جاري آهي. طبي ثبوتن، اسپتال جي رڪارڊ ۽ ٻين لاڳاپيل رپورٽن جي بنياد تي وڌيڪ قانوني ڪارروائي ڪئي ويندي. پوليس جو چوڻ آهي ته جيڪڏهن طبي غفلت يا ڪنهن به قسم جي لاپرواهي ثابت ٿي ته قانون موجب ذميوار ماڻهن خلاف سخت ڪارروائي ڪئي ويندي.