ڏوڪري ۾ پروموشنن جي لاءِ ملازمن جو يارهين ڏينهن به احتجاج جاري

رائيس ريسرچ سينٽر ڏوڪري ۾ آل سنڌ ايگريڪلچر ريسرچ ريجنل ايمپلائيز يونين پاران احتجاج ڪيو ويو

ڏوڪري (رپورٽر) ڏوڪري ۾ پروموشنن لاءِ ملازمن جو احتجاج يارهين ڏينهن به جاري، نئين سينيارٽي لسٽ جاري ڪرڻ جو مطالبو. تفصيل موجب رائيس ريسرچ سينٽر ڏوڪري ۾ آل سنڌ ايگريڪلچر ريسرچ ريجنل ايمپلائيز يونين (سي بي اي) پروموشنن لاءِ ملازمن جو احتجاج يارهين ڏينهن به جاري نئين سينيارٽي لسٽ جاري ڪرڻ جو مطالبو، مرڪزي سينيئر نائب صدر ارشاد احمد جوڻيجو، يونٽ صدر ڀورل ڪوريجو ۽ ملازم اڳواڻ توفيق ميراڻي جي اڳواڻي ۾ ملازمن پاران مطالبن جي مڃتا لاءِ احتجاجي مظاهرو ڪيو ويو ان موقعي تي ملازمن ميڊيا سان ڳالهائيندي چيو ته ايگريڪلچر ريسرچ سنڌ ۾ ڪم ڪندڙ گريڊ هڪ کان چار تائين جي ملازمن کي سندن جائز پروموشنن کان محروم رکيو پيو وڃي. هنن الزام هنيو ته ٽائيم اسڪيل حاصل ڪندڙ ملازمن کي سينيارٽي لسٽ ۾ شامل ڪرڻ سبب ٻين ملازمن جي حق تلفي ٿي رهي آهي. احتجاج ڪندڙ ملازمن سخت نعريبازي ڪندي مطالبو ڪيو ته ٽائيم اسڪيل ورتل ملازمن کي موجوده سينيارٽي لسٽ مان خارج ڪري نئين ۽ شفاف سينيارٽي لسٽ جاري ڪئي وڃي، جيئن گريڊ هڪ کان چار تائين جي ملازمن کي جلد پروموشن ڏئي سندن بيچيني ختم ڪئي وڃي. هنن سنڌ جي وزير زراعت محمد بخش مهر ۽ سيڪريٽري زراعت سنڌ کان اپيل ڪئي ته ملازمن جي جائز مطالبن تي فوري ڌيان ڏئي مسئلو حل ڪيو وڃي ۽ حقيقي سينيارٽي جي بنياد تي پروموشنن جو عمل مڪمل ڪيو وڃي ٻي صورت ۾ احتجاج جو دائرو وڌايو ويندو.