ڪراچي پوليس پاران هفتي 940 کان وڌيڪ جوابدار گرفتارڪرڻ جي دعويٰ

هفتي دوران پوليس ۽ جوابدارن وچ ۾ مجموعي طور 36 مقابلا ٿيا: پوليس ترجمان

ملير (رپورٽ: عبدالرشيد مورجھريو) ڪراچي پوليس شهر ۾ ڏوهارين خلاف جاري ڪارروائين دوران گذريل هڪ هفتي ۾ اهم ڪاميابيون حاصل ڪندي 940 کان وڌيڪ جوابدارن کي گرفتار ڪري ورتو آهي۔پوليس ترجمان موجب گذريل هفتي دوران ڪراچي پوليس ۽ جوابدارن وچ ۾ مجموعي طور 36 مقابلا ٿيا، جن دوران 3 جوابدار مارجي ويا جڏهن ته 44 زخمي ڦورن سميت 54 جوابدارن کي رنگي هٿ گرفتار ڪيو ويو۔پوليس موجب مختلف علائقن ۾ ڪارروائين دوران منشيات فروشي ۾ ملوث جوابدارن کان لکين رپين ماليت جي منشيات پڻ هٿ ڪئي وئي، جنهن ۾ 18 ڪلو 238 گرام چرس، 2 ڪلو 95 گرام آئس/ڪرسٽل ۽ هيروئن شامل آهي۔گرفتار جوابدارن جي قبضي مان 153 مختلف قسمن جو غير قانوني هٿيار پڻ هٿ ڪيو ويو، جن ۾ پسٽل، رائفلون ۽ ٻيا هٿيار شامل آهن۔ڪراچي پوليس هڪ هفتي دوران شهرين کان ڦريل ۽ چوري ٿيل 86 موٽر سائيڪلون ۽ 4 وڏيون گاڏيون پڻ هٿ ڪري ورتيون آهن، جن کي اصل مالڪن حوالي ڪرڻ جو عمل شروع ڪيو ويو آهي۔پوليس موجب گرفتار جوابدارن خلاف مختلف ٿاڻن ۾ ڪيس داخل ڪيا ويا آهن ۽ وڌيڪ جاچ جاري آهي۔ پوليس اختيارين جو چوڻ آهي ته شهر ۾ امن امان جي صورتحال کي بهتر بڻائڻ لاءِ ڏوهارين خلاف ڪارروايون وڌيڪ تيز ڪيون وينديون۔