ملير: گلشن حديد ۾ ايران تي حملن ۽ ڳاٽي ٽوڙ مهانگائي خلاف ريلي

آمريڪا ۽ اسرائيل طرفان ايران تي جنگ مڙهڻ سان عالمي امن کي خطرو پيدا ٿيو آهي: اڳواڻ

ملير (رپورٽ: عبدالرشيد مورجھريو) عوامي تحريڪ، سنڌياڻي تحريڪ ۽ سجاڳ ٻار تحريڪ ملير طرفان آمريڪا ۽ اسرائيل طرفان ايران تي مڙهيل جنگ، تيل جي اگهن ۾ واڌ ۽ وڌندڙ مهانگائي خلاف گلشن حديد ۾ احتجاجي ريلي عوامي تحريڪ ڪراچي جي عبدالله ٻپڙ، علي محمد بلوچ، اقبال جروار، عزيز لانگاھ، ڊاڪٽر رحمت الله بيروھي،سنڌي مزدور تحريڪ جي جبارپليجو، عوامي لائر فورم ملير صدر رستم ميراڻي،سڄاڳ ٻار تحريڪ مرڪزي اگواڻ ڀورا لال جي اڳواڻي ۾ گلشن حديد مان شروع ٿي، جيڪا مختلف رستن تان ٿيندي الله واري چورنگي وٽ پهچي ڌرڻي ۾ تبديل ٿي وئي، جتي ڪارڪنن سخت نعريبازي ڪندي احتجاج رڪارڊ ڪرايو۔ان موقعي تي اڳواڻن خطاب ڪندي چيو ته آمريڪا ۽ اسرائيل طرفان ايران تي جنگ مڙهڻ سان عالمي امن کي خطرو پيدا ٿيو آهي ۽ ان جا اثر سڌي طرح غريب ملڪن جي عوام تي پوندا۔ هنن چيو ته جنگن سبب تيل جي اگهن ۾ واڌ ٿي رهي آهي، جنهن ڪري مهانگائي جو طوفان اچي ويو آهي ۽ عوام جو جيئڻ ڏکيو بڻجي ويو آهي۔اڳواڻن وڌيڪ چيو ته حڪومت مهانگائي تي ضابطو آڻڻ ۾ ناڪام ٿي وئي آهي، روزمره استعمال جون شيون عوام جي پهچ کان ٻاهر ٿي رهيون آهن، جڏهن ته مزدور ۽ پورهيت طبقو سخت معاشي بحران جو شڪار آهي۔هنن مطالبو ڪيو ته ايران خلاف جارحيت بند ڪئي وڃي، تيل جي اگهن ۾ واڌ واپس ورتي وڃي ۽ مهانگائي تي ضابطو آڻي عوام کي رليف فراهم ڪيو وڃي، ٻي صورت ۾ احتجاج جو دائرو وڌايو ويندو۔احتجاج ۾ شريڪ ڪارڪنن هٿن ۾ بينر ۽ پلي ڪارڊ کڻي آمريڪا، اسرائيل ۽ مهانگائي خلاف سخت نعريبازي ڪئي، جڏهن ته آخر ۾ اڳواڻن اعلان ڪيو ته عوامي مسئلن جي حل تائين احتجاج جاري رکيو ويندو۔