گهگهر ڀرسان واٽر بورڊ لائن ۾ پيءُ پٽ لڙهي ويا، ريسڪيو عملي کين بچائي ورتو

نينگر رياض پاڻي جي اونهي لائن ۾ ڪِري پيو, کيس بچائڻ لاءِ سندس پيءُ صدام ڪلمتي به ٽپو ڏنو، ٻئي وهڪڙي ۾ لڙهي ويا

ملير (رپورٽ: عبدالرشيد مورجھريو) گهگهر سيمينٽ فيڪٽري ڀرسان حنيف بلوچ ڪلمتي ڳوٺ ۾ واٽر بورڊ جي کليل پاڻي واري لائن ۾ ڪري پيل پيءُ ۽ پٽ کي ريسڪيو ٽيم ڪيترن ئي ڪلاڪن بعد محفوظ طور ٻاهر ڪڍي ورتو. واقعي سبب علائقي ۾ خوف ۽ هراس پکڙجي ويو، جڏهن ته ضلعي ۽ ٽائون انتظاميا جي غيرموجودگي تي علائقي واسين سخت ڪاوڙ جو اظهار ڪيو.موقعي تي موجود سماجي اڳواڻ افضل جوکيو موجب حنيف بلوچ ڳوٺ جو رهواسي ننڍڙو رياض ڪلمتي وهنجڻ لاءِ گهگهر سيمينٽ ڪمپني ڀرسان واٽر بورڊ جي اونهي لائن ۾لٿون جتي اوچتو پير سلپ ٿيڻ سبب هو پاڻي ۾ ڪري پيو. پٽ کي ٻڏندي ڏسي پيءُ صدام ڪلمتي فوري طور کيس بچائڻ لاءِ لائن ۾ ٽپو ڏنو، پر پاڻي جي تيز وهڪري سبب هو به پاڻ کي سنڀالي نه سگهيو ۽ ٻئي پيءُ پٽ پاڻي ۾ ٻڏي ويا.واقعي جو اطلاع ملندي ئي مقامي ماڻهو وڏي انگ ۾ موقعي تي گڏ ٿي ويا ۽ پنهنجي مدد پاڻ تحت ڳولا شروع ڪئي وئي. بعد ۾ ريسڪيو اهلڪارن کي اطلاع ڏنو وئو ٽيم فوري طور پهچي سرچ آپريشن شروع ڪيو.ريسكيو اختيارين موجب لڳاتار ڪوششن کانپوءِ پيءُ ۽ پٽ رياض ۽ صدام ڪلمتي کي محفوظ طور ٻاهر ڪڍيو ويو، جن کي فوري طور ابتدائي طبي امداد فراهم ڪئي وئي. ٻنهي جي حالت خطري کان ٻاهر ٻڌائي پئي وڃي.علائقي واسين موجب واٽر بورڊ جي هي لائن کليل ۽ غير محفوظ حالت ۾ موجود آهي، جنهن سبب اڳ به اهڙن حادثن جو خدشو ظاهر ڪيو ويندو رهيو آهي. شهرين لاڳاپيل ادارن جي غفلت کي واقعي جو ذميوار قرار ڏيندي چيو ته جيڪڏهن وقت سر حفاظتي اپاءَ ورتا وڃن ها ته اهڙو افسوسناڪ واقعو پيش نه اچي ها.علائقي واسين مطالبو ڪيو آهي ته واٽر بورڊ جي کليل ۽ خطرناڪ لائنن کي فوري طور محفوظ بڻايو وڃي ته جيئن مستقبل ۾ ڪنهن وڏي سانحي کان بچي سگهجي. واقعي دوران ضلعي ۽ ٽائون انتظاميا جي غير موجودگي تي پڻ علائقي واسين سخت ڪاوڙ جو اظهار ڪيو.