پی پی قومی تحریک سے ڈرتی ہے، جتنے بھی راستے روک لیے جائیں تحریک آگے بڑھے گی: ڈاکٹر نیاز کالانی / آصف بالادی

کراچی (رپورٹر) جيئي سنڌ قومي محاذ بشير خان گروپ کے رہنما ڈاکٹر نیاز کالانی اور جسقم میں دوبارہ شامل ہونے والے آصف بالادی کو کل شام کراچی پریس کلب میں پریس کانفرنس کرنے سے قبل صبح سے پولیس نے گھیر لیا اور ان کی گاڑی کو روک کر گرفتار کر کے آرٹلری تھانہ منتقل کر دیا، جہاں سے انہیں دو گھنٹے بعد اس شرط پر رہا کیا گیا کہ وہ کراچی پریس کلب نہیں جائیں گے اور صحافیوں سے بات نہیں کریں گے۔ جسقم بشير خان گروپ کی طرف سے یہ پریس کانفرنس آصف بالادی کی جانب سے جسقم بشير خان قریشی گروپ میں شمولیت کے اعلان کے لیے رکھی گئی تھی، لیکن اس سے قبل دونوں رہنماؤں سمیت مرتضی شاہانی، پنھل ساريو، کاشف شر اور دیگر کو گرفتار کر لیا گیا۔ اس موقع پر پریس کلب کے چارد طرف کے داخلی راستے سیل کر دیے گئے، اور کلب کے مرکزی گیٹ کے سامنے پولیس موجود تھی، جہاں صحافیوں کے کارڈ بھی چیک کیے گئے۔ جسقم بشير خان قریشی گروپ میں شامل ہونے والے سابق سیاسی کارکن آصف بالادی نے فیس بک کے ذریعے اعلان کیا کہ پیپلزپارٹی سندھ حکومت قومی تحریک سے اس لیے ڈرتی ہے کہ اظہار رائے پر پابندی لگا رہی ہے، کیونکہ پیپلزپارٹی سندھ کی زمین اور معدنی وسائل فروخت کر کے کرپشن کی بنیاد پر حکومت کر رہی ہے۔ ڈاکٹر نیاز کالانی نے کہا کہ ریاست اور سندھ کے حکمران جتنے بھی راستے روک لیں، لیکن رہبر سندھ سائیں جی ایم سید کے راستے پر چلتے ہوئے سندھ کی قومی آزادی کی تحریک آگے بڑھتی رہے گی۔