اسرائیل کا غزہ میں 71 ہزار فلسطینیوں کی شہادت کا اعتراف

تل ابیب (ویب ڈیسک) اسرائیلی فوج نے غزہ میں 71 ہزار فلسطینیوں کی شہادت کا اعتراف کر لیا ہے۔ اسرائیلی میڈیا رپورٹس کے مطابق ایک سینئر اسرائیلی عہدیدار نے اعتراف کیا ہے کہ حماس کے زیرِ انتظام غزہ کی وزارتِ صحت کی جانب سے جاری کیے گئے ہلاکتوں کے اعداد و شمار مجموعی طور پر درست ہیں۔ رپورٹ میں بتایا گیا ہے کہ یہ اعداد و شمار صرف اسرائیلی فوجی کارروائیوں کے دوران شہید ہونے والے فلسطینیوں پر مشتمل ہیں، جبکہ ملبے تلے دبے لاپتا افراد، بھوک اور بیماریوں کے باعث جاں بحق ہونے والوں کو ان میں شامل نہیں کیا گیا۔ واضح رہے کہ اس سے قبل اسرائیل غزہ کی وزارتِ صحت کے اعداد و شمار کو مسترد کرتا رہا ہے، جبکہ اقوامِ متحدہ کا ادارہ ان اعداد و شمار کو قابلِ اعتماد قرار دیتا رہا ہے۔ یاد رہے کہ غزہ کی وزارتِ صحت کے مطابق 7 اکتوبر 2023 سے اب تک اسرائیلی حملوں میں 71 ہزار 667 فلسطینی شہید ہو چکے ہیں۔