ملڪ هن وقت شديد معاشي، سماجي ۽ انتظامي بحران جو شڪار آهي: عبدالمجيد سمون

جماعت اسلامي ضلعي ٺٽي پاران”نظام بدلايو تحريڪ“ جو اعلان

ٺٽو (شفيق ڀٽي)جماعت اسلامي ضلعي ٺٽي پاران ملڪ گير مهم جي سلسلي ۾ ”نظام بدلايو تحريڪ“ جو باضابطه آغاز ڪيو ويو آهي۔ ان سلسلي ۾ عوامي پريس ڪلب ٺٽو ۾ ھڪ پر ھجوم پريس ڪانفرنس منعقد ڪئي وئي، جنهن ۾ جماعت اسلامي جي ضلعي ۽ مقامي اڳواڻن وڏي انگ ۾ شرڪت ڪئي۔پريس ڪانفرنس کي خطاب ڪندي امير جماعت اسلامي ضلعوٺٽو عبدالمجيد سمون چيو ته ملڪ هن وقت شديد معاشي، سماجي ۽ انتظامي بحران جو شڪار آهي۔ مهانگائي، بيروزگاري ۽ بدامني ۾ مسلسل اضافو ٿي رهيو آهي، جڏهن ته عام ماڻهوءَ جي زندگي زھر بڻجي چڪي آهي۔ هن چيو ته ملڪ ۾ قانون جي بالادستي ختم ٿيندي پئي وڃي ڪمزور طبقو ظلم جي چڪي ۾ پيسجي رھيو آهي۔ان موقعي تي جنرل سيڪريٽري جماعت اسلامي ضلو ٺٽو عبدالله آدم گندرو چيو ته حڪمران عوامي مسئلن کان مڪمل طور لاتعلق ٿي چڪا آهن، قومي وسيلن جو بي دريغ ۽ غلط استعمال ڪيو پيو وڃي، جڏهن ته عوام بنيادي سهولتن کان محروم آهي۔امير جماعت اسلامي ڪئمپ غلام حيدر شورو ۽ جنرل سيڪريٽري يوٿ مظفر علي خاصخيلي چيو ته جماعت اسلامي سموري ملڪ ۾ هڪ منظم ۽ پرامن تحريڪ وسيلي عوام کي پنهنجن حقن لاءِ بيدار ڪري رهي آهي۔ هنن واضح ڪيو ته هي تحريڪ آئيني ۽ جمهوري دائري ۾ رهندي هلائي ويندي۔پريس ڪانفرنس ۾ سمير ميمڻ سميت جماعت اسلامي جا ٻيا اڳواڻ به موجود هئا، جن چيو ته حالتن ۾ بهتري نه اچڻ تائين ھن مھم کي جاري رکيو ويندو ۽ عوام کي ڀرپور نموني سان هن جدوجهد ۾ شامل ڪيو ويندو۔آخر ۾ اڳواڻن ان عزم جو اظهار ڪيو ته ”نظام بدلايو تحريڪ“ وسيلي ملڪ ۾ انصاف، شفافيت ۽ حقيقي عوامي ڀلائيءَ تي ٻڌل نظام قائم ڪرڻ لاءِ جدوجهد جاري رکي ويندي۔