پاکستانی نوجوانوں کے لیے خوشخبری: روس میں مفت تعلیم حاصل کرنے کا شاندار موقع، رجسٹریشن کیسے ہوگی؟

اسلام آباد (ویب ڈیسک) پاکستانی نوجوانوں کے لیے روس میں اعلیٰ تعلیم حاصل کرنے کا شاندار موقع آ گیا ہے۔ پاکستان میں روسی سفارتخانے کی جانب سے جاری بیان کے مطابق پیپلز فرینڈشپ یونیورسٹی آف رشیا (RUDN University) کے زیر اہتمام اوپن اولمپیاڈ کی آن لائن رجسٹریشن شروع ہو چکی ہے، جس میں پاکستانی طلبہ بھی حصہ لے سکتے ہیں۔ یہ موقع ان نوجوانوں کے لیے خاص اہمیت رکھتا ہے جو بیرون ملک معیاری اور کم خرچ میں تعلیم کے مواقع تلاش کر رہے ہیں۔ اس میں وہ طلبہ اہل ہیں جنہوں نے ہائی اسکول مکمل کیا ہو، کالج کی تعلیم مکمل کی ہو یا یونیورسٹی کے آخری سال میں پڑھ رہے ہوں۔ اوپن اولمپیاڈ کے ذریعے تمام امیدوار اپنی تعلیمی صلاحیتوں کو آن لائن آزما سکتے ہیں، اور ان نتائج کی بنیاد پر روس میں اعلیٰ تعلیم کے لیے آگے بڑھ سکتے ہیں۔ روسی سفارتخانے کے مطابق اس تعلیمی مقابلے میں شاندار کارکردگی دکھانے والے امیدواروں کو روسی حکومت کی تعلیمی کوٹہ کے تحت RUDN یونیورسٹی میں مکمل طور پر مفت تعلیم حاصل کرنے کا موقع دیا جائے گا۔ ٹیسٹ میں پہلی پوزیشن حاصل کرنے والے طلبہ کے تمام تعلیمی اخراجات روسی حکومت برداشت کرے گی، جبکہ دیگر کامیاب امیدواروں کو فیس میں رعایت دی جائے گی۔ مزید یہ کہ کچھ امیدواروں کو مختص کوٹہ کے تحت مکمل مفت تعلیم کی سہولت بھی مل سکتی ہے۔ داخلہ کے لیے امیدواروں کو سب سے پہلے آن لائن رجسٹریشن کرانی ہوگی، جس کے دوران پاسپورٹ، قومی شناختی کارڈ، تعلیمی اسناد اور پچھلے تعلیمی سال کے نمبرز یا گریڈ اپ لوڈ کرنا لازمی ہوگا۔ شروعاتی مرحلے میں آن لائن ٹیسٹ لیا جائے گا، جس میں کامیاب امیدواروں کو اگلے مرحلے میں انفرادی انٹرویو کے لیے دعوت دی جائے گی۔