بشکیک: پاکستان کی قیادت

نوید معراج

وزیراعظم محمد شہباز شریف کا بشکیک، کرغزستان کا دورہ سفارتی اور دوطرفہ، دونوں حوالوں سے انتہائی اہمیت کا حامل تھا۔ سفارتی اعتبار سے یہ دورہ ایسے وقت میں ہوا جب پاکستان نے 2026-27 کے لیے شنگھائی تعاون تنظیم (SCO) کی کونسل آف ہیڈز آف اسٹیٹ کی صدارت سنبھالی ہے۔ دوطرفہ سطح پر اس دورے نے پاکستان اور کرغزستان کو اقتصادی، تجارتی، توانائی اور علاقائی رابطوں کے شعبوں میں تعلقات کو نئی رفتار دینے کا موقع فراہم کیا۔ ایس سی او کی صدارت سنبھالنے کو پاکستان کی حالیہ بہتر ہوتی ہوئی عالمی حیثیت سے الگ نہیں کیا جا سکتا۔ حالیہ عرصے میں پاکستان کی سفارتی پوزیشن میں نمایاں بہتری آئی ہے اور ایس سی او کی صدارت بھی اس اعتماد کی عکاسی کرتی ہے جو اب پاکستان کی قیادت اور علاقائی و عالمی معاملات میں اس کے تعمیری کردار پر کیا جا رہا ہے۔ ایس سی او یوریشیا کے بعض اہم ترین ممالک کو ایک پلیٹ فارم پر جمع کرتی ہے، جبکہ اس کے ایجنڈے میں سلامتی، اقتصادی تعاون، علاقائی رابطہ کاری، توانائی، ٹیکنالوجی اور علاقائی استحکام جیسے اہم شعبے شامل ہیں۔ پاکستان کی جانب سے ایس سی او کی صدارت سنبھالنا محض تنظیمی ذمہ داری کی معمول کی گردش نہیں بلکہ پاکستان کی اس صلاحیت پر اعتماد کا اظہار ہے کہ وہ مذاکرات کی قیادت، اتفاقِ رائے پیدا کرنے اور تنظیم کے وژن کو عملی تعاون میں تبدیل کرنے میں مؤثر کردار ادا کر سکتا ہے۔ پاکستان نے اپنی صدارت کے لیے "Turning Vision into Action: Connectivity, Innovation and Shared Prosperity" یعنی "وژن کو عمل میں تبدیل کرنا: رابطہ کاری، جدت اور مشترکہ خوشحالی" کا عنوان منتخب کیا ہے، جو اس کے عزائم کی عکاسی کرتا ہے۔ اس کے ذریعے اسلام آباد کو تجارت اور ٹرانسپورٹ کے روابط سے لے کر مصنوعی ذہانت، توانائی، صحت، ثقافت اور غربت کے خاتمے تک ایسے شعبوں پر توجہ مرکوز کرنے کا موقع ملے گا جو خطے کے مستقبل پر براہِ راست اثرانداز ہوتے ہیں۔ اس سفارتی ذمہ داری کا وقت بھی خاص اہمیت رکھتا ہے۔ گزشتہ ایک برس کے دوران پاکستان نے تزویراتی قوت اور سفارتی پختگی، دونوں کا مظاہرہ کیا ہے۔ گزشتہ سال کا معرکۂ حق ملک کی عسکری صلاحیت اور اپنی خودمختاری کے دفاع کے عزم کا مظہر تھا۔ اس کے بعد امریکہ اور ایران کے تنازع میں امن اور کشیدگی میں کمی کے لیے پاکستان کے کردار نے اس کے بڑھتے ہوئے سفارتی اثر و رسوخ کا ایک اور پہلو دنیا کے سامنے پیش کیا۔ اسلام آباد نے ثابت کیا کہ شدید علاقائی کشیدگی کے ماحول میں بھی وہ اپنے سفارتی دائرۂ کار کو مذاکرات اور امن کے فروغ کے لیے استعمال کر سکتا ہے۔ عسکری صلاحیت اور سفارتی روابط کے اس امتزاج نے عالمی سطح پر پاکستان کی پوزیشن کو مضبوط کیا ہے۔ جو ملک ضرورت پڑنے پر اپنا دفاع کرنے کی صلاحیت رکھتا ہو اور ساتھ ہی امن و مذاکرات کے فروغ میں بھی کردار ادا کر سکتا ہو، عالمی نظام میں اس کے احترام میں اضافہ ہوتا ہے۔ پاکستان کی بہتر ہوتی ہوئی عالمی حیثیت کا کریڈٹ بڑی حد تک بلاشبہ وزیراعظم شہباز شریف اور چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر کو جاتا ہے۔ ان دونوں کی اپنی اپنی ذمہ داریوں کے دائرے میں ادا کی جانے والی قیادت نے پاکستان کو اپنے قومی مفادات کو زیادہ اعتماد کے ساتھ آگے بڑھانے کے لیے وسیع تر سفارتی گنجائش فراہم کرنے میں اہم کردار ادا کیا ہے۔ بشکیک میں ایس سی او کونسل آف ہیڈز آف اسٹیٹ سے خطاب کرتے ہوئے وزیراعظم شہباز شریف نے تنازعات کے پرامن حل اور کثیرالجہتی نظام کے لیے پاکستان کے عزم کو اجاگر کیا۔ ان کی جانب سے علاقائی رابطہ کاری پر زور خاص طور پر اہم تھا۔ پاکستان مسلسل اس مؤقف کا اظہار کرتا آیا ہے کہ خطے کا اقتصادی مستقبل جنوبی ایشیا کو وسطی ایشیا اور اس سے آگے کے خطوں سے جوڑنے میں ہے۔ سی پیک، سڑکوں اور ریلوے کے روابط، توانائی کے منصوبے اور بحیرۂ عرب تک رسائی وسطی ایشیائی ممالک کو عالمی منڈیوں تک نئی راہیں فراہم کر سکتے ہیں۔ ایس سی او کی صدارت پاکستان کو اس وژن کو عملی شکل دینے کا ایک اہم موقع فراہم کرتی ہے۔ پاکستان اگلے سال اسلام آباد میں ایس سی او کونسل آف ہیڈز آف اسٹیٹ کے سربراہ اجلاس کی میزبانی بھی کرے گا۔ یہ ایک بڑا سفارتی موقع ہوگا، جہاں پاکستان اپنی مہمان نوازی، سفارتی صلاحیت اور علاقائی اقتصادی و رابطہ کاری کے مرکز کے طور پر اپنی استعداد کو دنیا کے سامنے پیش کر سکے گا۔ لاہور کو 2026-27 کے لیے ایس سی او ٹورازم اینڈ کلچرل کیپیٹل قرار دیا جانا بھی پاکستان کی صدارت کو ایک اہم ثقافتی پہلو فراہم کرتا ہے۔ لاہور خطے کے تاریخی اور ثقافتی اعتبار سے اہم ترین شہروں میں شمار ہوتا ہے۔ اس کا فنِ تعمیر، ادب، موسیقی، کھانے اور روایات پاکستان کو ایس سی او کے رکن ممالک کے عوام کے ساتھ رسمی حکومتی سفارت کاری سے آگے بڑھ کر روابط قائم کرنے کا موقع فراہم کرتے ہیں۔ یہ اعزاز لاہور کو ثقافت اور تاریخ کے ایک اہم مرکز کے طور پر دنیا کے سامنے پیش کرنے کے ساتھ ساتھ پاکستان کی وسیع تر سفارتی رسائی میں بھی مدد دے گا۔ بشکیک دورے کا دوطرفہ پہلو بھی اتنا ہی اہم تھا۔ وزیراعظم شہباز شریف اور کرغزستان کے صدر صدر صادیر جاپاروف کے درمیان ملاقات نے دونوں ممالک کے درمیان دیرینہ دوستی کو مضبوط اقتصادی شراکت داری میں تبدیل کرنے کے مشترکہ عزم کی عکاسی کی۔ متعدد مفاہمتی یادداشتوں اور معاہدوں پر دستخط کے دوران دونوں ممالک نے دوطرفہ تجارت کو 20 کروڑ ڈالر تک بڑھانے کے لیے کام کرنے پر اتفاق کیا۔ ٹرانزٹ تجارت سے متعلق معاہدے پر دستخط سے اشیا کی نقل و حرکت میں سہولت پیدا ہوگی اور نئی تجارتی سرگرمیوں کے مواقع پیدا ہوں گے۔ کرغزستان ایک خشکی میں گھرا ہوا ملک ہے، اس لیے پاکستان کی بندرگاہیں اسے دنیا کے دیگر حصوں سے جوڑنے کے لیے ایک اہم راستہ فراہم کرتی ہیں۔ صدر صادیر جاپاروف نے بھی پاکستان کی اس جغرافیائی اہمیت کو تسلیم کرتے ہوئے کہا کہ پاکستان کی بندرگاہیں کرغزستان کو علاقائی منڈیوں اور عالمی تجارتی راستوں تک قدرتی رسائی فراہم کرتی ہیں۔ یہ اعتراف اس لیے بھی اہم ہے کہ اس سے وسطی ایشیا کو سمندری راستوں سے جوڑنے میں پاکستان کے ممکنہ کردار کی اہمیت واضح ہوتی ہے۔ خلیج میں حالیہ بحران نے بھی متبادل اور قابلِ اعتماد تجارتی راستوں کی اہمیت کو اجاگر کیا ہے۔ پاکستان کا جغرافیائی محلِ وقوع اسے خطے کے لیے ایک بڑے ٹرانزٹ اور ٹرانس شپمنٹ مرکز کے طور پر ابھرنے کے لیے کئی بنیادی فوائد فراہم کرتا ہے۔ بشکیک کا دورہ دونوں محاذوں پر ایک واضح پیغام لے کر آیا۔ سفارتی سطح پر پاکستان کو ایک اہم علاقائی تنظیم میں زیادہ بڑی ذمہ داری سونپی گئی ہے، جبکہ دوطرفہ سطح پر وسطی ایشیا کے ساتھ مضبوط اقتصادی روابط کے لیے ایک اور اہم راستہ کھلا ہے۔ ہمیں یقین ہے کہ پاکستان کی سول اور عسکری قیادت اس رفتار کو برقرار رکھے گی، تاکہ ملک اپنے بڑھتے ہوئے سفارتی اثر و رسوخ اور تزویراتی اہمیت کو مزید اقتصادی مواقع اور عوام کے لیے پائیدار خوشحالی میں تبدیل کر سکے۔