ملير جو سماجي اڳواڻ حاجي عبيدالله ڪلمتي لاڏاڻو ڪري ويو، جنازي نماز ۾ وڏي انگ ۾ ماڻهن جي شرڪت

جنازي نماز ۾ ايم پي ايز سليم بلوچ، راجا عبدالرزاق، ساجد جوکيو، مقامي اڳواڻ رياض بلوچ ۽ ٻيا شريڪ

ملير (رپورٽ: عبدالرشيد مورجھريو) نامياري قبائلي ۽ سماجي شخصيت حاجي عبيدالله ڪلمتي لاڏاڻو ڪري ويو. هو سياسي ۽ سماجي اڳواڻ قادربخش ڪلمتي، ڊي جي گوادر پورٽ انجنيئر داود ڪلمتي ۽ شاهه محمد ڪلمتي جو وڏو ڀاءُ هو. سندس وفات تي علائقي ۾ ڏک ۽ سوڳ جي لهر ڇانئجي ويئي مرحوم جي جنازي نماز ڪاٺوڙ سراج ڳوٺ ۾ ادا ڪئي وئي، جنهن ۾ مختلف سياسي، سماجي ۽ قبائلي اڳواڻن سميت هزارين ماڻهن شرڪت ڪئي. جنازي ۾ ايم پي اي سليم بلوچ،ايم پي اي راجا عبدالرزاق،ايم پي اي ساجد جوکيو، مقامي اڳواڻ رياض بلوچ، امداد جوکيو عوامي پريس ڪلب جي صدر سجاد شاهه، جنرل سيڪريٽري طارق جان سهتو، سامي ميمڻ، عنايت شاه، ڊاڪٽر اصغر ميمڻ ۽ ٻين معززن وڏي انگ ۾ شرڪت ڪري مرحوم کي ڀيٽا پيش ڪئي.ان موقعي تي اڳواڻن مرحوم جي سماجي خدمتن کي ساراهيندي چيو ته حاجي عبيدالله ڪلمتي هميشه علائقي جي ڀلائي، ڀائيچاري ۽ اتحاد لاءِ ڪوشان رهيو. سندس لاڏاڻي سان علائقي کي وڏو نقصان پهتو آهي. جنازي نماز کان پوءِ مرحوم کي مقامي قبرستان ۾ مٽي ماءُ حوالي ڪيو ويو.