نوشهروفيروز قومي شاهراهه جي هلندڙ مرمتي ڪم سبب وڌيڪ هڪ حادثو، 6 ڄڻا اجل جو شڪار

نوشهرو فيروز (ڊ ر)نوشهرو فيروز جي حدن اندر قومي شاهراهه تي هلندڙ مرمتي ڪم وڌيڪ ڇهن گهرن جا ڏيئا وسائي ڇڏيا۔ نانگو شاهه موري اسٽاپ ڀرسان منان پيٽرول پمپ وٽ ٻن ٽريلرن جي ٽڪر ۾ اچي ڪار سوار ڇهه ڄڻا موقعي تي فوت ٿي ويا۔ پوليس موجب فوتين ۾ نديم علي سولنگي، غلام رسول سولنگي، عبدالحڪيم سولنگي، بخشل سولنگي، سهراب سولنگي ۽ ڪار ڊرائيور منظور بروهي شامل آهن، جيڪي لاڙڪاڻي ضلعي جي علائقي لالو رائنڪ سان واسطو رکن ٿا ۽ ڪراچي وڃي رهيا هئا۔ قومي شاهراهه تي مرمتي ڪم سبب هڪ طرفي ٽريفڪ هلي رهي هئي، جنهن دوران تيز رفتاري سبب ڪار ٻن ٽريلرن جي وچ ۾ اچي وئي ۽ افسوسناڪ حادثو پيش آيو۔لاشون سول اسپتال نوشهرو فيروز منتقل ڪيون ويون آهن، جڏهن ته حادثي ۾ ٽريلر جا ڊرائيور به زخمي ٿيا آهن، جن کي اسپتال منتقل ڪيو ويو آهي۔ ان سلسلي ۾ انٽرنيشنل هيومن رائٽس آبزرور نوشهرو فيروز جي ڪوآرڊينيٽر محمد سليم مغل افسوس جو اظهار ڪندي چيو آهي ته مورو کان ڪوٽڙي محمد ڪبير تائين قومي شاهراهه جي مرمت وارو ڪم سست رفتاري جو شڪار آهي، جنهن سبب حادثا روز جو معمول بڻجي چڪا آهن۔ هن چيو ته تعميراتي ڪمپني جي نااهلي سبب اهم شاهراهه تي ڪم ۾ دير ٿي رهي آهي، تنهن ڪري اڄوڪي حادثي ۾ فوت ٿيل ماڻهن جي انصاف لاءِ تعميراتي ڪمپني خلاف ڪيس داخل ڪيو وڃي۔