کراچی پریس کلب کے سالانہ انتخابات برائے 2026 میں دی ڈیموکریٹس پینل نے شاندار کامیابی حاصل کرتے ہوئے مسلسل 18ویں مرتبہ کلین سویپ کر لیا۔
کراچی پریس کلب کے انتخابات ہفتہ کے روز صبح 9 بجے سے شام ساڑھے 5 بجے تک جاری رہے، جہاں پولنگ کے دوران ممبران میں غیر معمولی جوش و خروش دیکھنے میں آیا۔ پریس کلب کے 1369 رجسٹرڈ ووٹرز میں سے 1011 ممبران نے اپنے حقِ رائے دہی کا استعمال کیا۔
الیکشن کمیٹی کے سربراہ ڈاکٹر توصیف احمد خان نے نتائج کا اعلان کیا، جس کے مطابق صدر کے عہدے پر دی ڈیموکریٹس پینل کے فاضل جمیلی 536 ووٹ لے کر کامیاب ہوئے، جبکہ سیکریٹری کے عہدے پر اسلم خان 493 ووٹ حاصل کر کے منتخب قرار پائے۔
دیگر نتائج کے مطابق نائب صدر کے عہدے پر ارشاد کھوکھر نے 480 ووٹ، خازن کے عہدے پر عمران ایوب نے 622 ووٹ اور جوائنٹ سیکریٹری کے عہدے پر فاروق سمیع نے 556 ووٹ لے کر کامیابی حاصل کی۔
گورننگ باڈی کی 7 نشستوں پر عبدالجبار ناصر، اختر حسین سومرو، شیما صدیقی، فریال عارف، جاوید صباء، سید فرید عالم اور جاوید مہر کامیاب قرار پائے۔
واضح رہے کہ یہ انتخابی مقابلہ دی ڈیموکریٹس پینل، ڈیموکریٹ پینل، گرین پینل اور آزاد امیدواروں کے درمیان ہوا، تاہم دی ڈیموکریٹس پینل نے ایک بار پھر میدان مار لیا اور اپنی مضبوط پوزیشن برقرار رکھی۔
0 تبصرے