تائیوان کے شمال مشرقی ساحل کے قریب آنے والے طاقتور زلزلے سے عمارتیں لرز اٹھیں، تاہم سونامی یا بڑے جانی نقصان کی کوئی اطلاع نہیں ملی۔
تائیوان کے شمال مشرقی ساحلی علاقے میں 7 شدت کا زلزلہ ریکارڈ کیا گیا، جس کے جھٹکے دارالحکومت تائی پے سمیت ملک کے مختلف حصوں میں محسوس کیے گئے۔ میڈیا رپورٹس کے مطابق زلزلے کے باعث بلند عمارتیں جھولتی رہیں، فانوس ہلتے دکھائی دیے اور شہریوں نے چند لمحوں کے لیے شدید لرزش محسوس کی۔
تائیوانی محکمہ موسمیات کے مطابق زلزلہ یلان کاؤنٹی کے ساحل سے تقریباً 30 کلومیٹر دور آیا، جس کی گہرائی 73 کلومیٹر تھی۔ ماہرین کے مطابق یہ اپریل 2024 کے تباہ کن زلزلے کے بعد جزیرے میں آنے والا سب سے بڑا زلزلہ ہے۔
موسمیاتی انتظامیہ نے زلزلے کی شدت کو انٹینسٹی فور قرار دیا، جو معمولی ساختی نقصان کے امکان کی نشاندہی کرتی ہے۔ اس سطح کے زلزلے میں گھروں کے اندر موجود اشیاء ہل سکتی ہیں اور سوتے ہوئے افراد جاگ سکتے ہیں، تاہم مضبوط تعمیرات کو عموماً شدید نقصان نہیں پہنچتا۔
تائیوان کے فائر ڈیپارٹمنٹ نے تصدیق کی ہے کہ شدید جھٹکوں کے باوجود ملک بھر میں کسی بڑے نقصان یا جانی نقصان کی اطلاع موصول نہیں ہوئی۔ زلزلے کے بعد یلان میں تین ہزار سے زائد گھروں کی بجلی عارضی طور پر منقطع ہو گئی، جسے تائیوان پاور کمپنی نے چند گھنٹوں میں بحال کر دیا۔
حکام کے مطابق زلزلے کے اثرات زیادہ تر مرکز کے قریب علاقوں تک محدود رہے، جبکہ سونامی کی کوئی وارننگ جاری نہیں کی گئی۔
0 تبصرے