پرواز میں چونکا دینے والا واقعہ، مبینہ طور پر مردہ خاتون کو وہیل چیئر پر بٹھا کر جہاز میں سوار کرا دیا گیا

اسپین سے برطانیہ جانے والی ایزی جیٹ پرواز اس وقت بحران کا شکار ہوئی جب ایک 89 سالہ خاتون کو جہاز میں مردہ قرار دے دیا گیا۔

اسپین کے شہر مالاگا سے لندن کے گیٹ وِک ایئرپورٹ جانے والی ایزی جیٹ کی پرواز ایک حیران کن واقعے کے باعث شدید ہنگامے اور طویل تاخیر کا شکار ہو گئی، جب ایک 89 سالہ برطانوی خاتون کو جہاز میں مردہ قرار دے دیا گیا۔ مسافروں کے مطابق ایک برطانوی خاندان اپنی بزرگ رشتے دار کو وہیل چیئر پر بٹھا کر جہاز میں سوار کروا رہا تھا اور عملے کو بتایا گیا کہ خاتون بیمار ہیں اور سو رہی ہیں۔ تاہم جب جہاز ٹیک آف کے لیے رن وے کی جانب بڑھا تو کیبن کریو کو خاتون کی حالت پر تشویش ہوئی۔ صورتحال کا جائزہ لینے کے بعد طیارے کو فوری طور پر واپس ٹرمینل لے جایا گیا، جہاں موجود طبی عملے نے خاتون کو مردہ قرار دے دیا۔ اس واقعے کے باعث پرواز تقریباً 12 گھنٹے کی تاخیر کا شکار ہوئی اور مسافروں کو شدید پریشانی کا سامنا کرنا پڑا۔ متعدد مسافروں نے سوشل میڈیا پر دعویٰ کیا کہ خاتون کی موت جہاز میں سوار ہونے سے پہلے ہی ہو چکی تھی اور خاندان کے افراد عملے کو مسلسل یہ یقین دلاتے رہے کہ وہ زندہ ہیں، حالانکہ حقیقت اس کے برعکس تھی۔ تاہم ایزی جیٹ نے ان الزامات کی تردید کرتے ہوئے کہا ہے کہ خاتون کے پاس میڈیکل "فِٹ ٹو فلائی" سرٹیفکیٹ موجود تھا اور وہ بورڈنگ کے وقت زندہ تھیں۔ ایئر لائن کے مطابق واقعے کی مکمل تحقیقات کی جا رہی ہیں۔