بلاول کی ٹوئٹ میں سامنے آنے والی باتیں خوفناک ہیں، سلمان اکرم راجا

پی ٹی آئی رہنما کا کہنا ہے کہ 27ویں ترمیم اور بلاول کی ٹوئٹ میں اٹھنے والے نکات تشویشناک ہیں۔

پاکستان تحریک انصاف (پی ٹی آئی) کے مرکزی رہنما سلمان اکرم راجا نے کہا ہے کہ بلاول بھٹو کی ٹوئٹ میں سامنے آنے والی باتیں انتہائی خوفناک اور تشویشناک ہیں۔ راولپنڈی میں اڈیالہ جیل کے قریب میڈیا سے گفتگو کرتے ہوئے انہوں نے بتایا کہ ان کی بانی پی ٹی آئی سے ملاقات کے حوالے سے اسلام آباد ہائی کورٹ نے آج خصوصی احکامات جاری کیے ہیں۔ سلمان اکرم راجا کا کہنا تھا کہ انہوں نے عدالت کا آرڈر ایس ایچ او کو واٹس ایپ پر بھیج دیا ہے، جبکہ حکم نامے کی اصل کاپی اُن کا ایسوسی ایٹ لے کر آرہا ہے۔ جسٹس ارباب نے ایڈووکیٹ جنرل کو ہدایت کی ہے کہ ملاقات کے انتظامات یقینی بنائے جائیں۔ انہوں نے کہا کہ ہم 27ویں آئینی ترمیم کو مسترد کرتے ہیں، کیونکہ فارم 47 کے نتائج پر کھڑی اسمبلی کو آئینی ترمیم کرنے کا کوئی اختیار نہیں۔ ان کے مطابق بلاول بھٹو کی ٹوئٹ میں جو نکات سامنے آئے ہیں وہ آئینی اور جمہوری تناظر میں نہایت سنگین ہیں۔ پی ٹی آئی رہنما کا مزید کہنا تھا کہ پاکستان میں آئین کے بنیادی ڈھانچے اور آزاد عدلیہ کے تصور کو تبدیل کیا جا رہا ہے، اور اس اقدام کی ہر سطح پر مزاحمت کی جائے گی۔ انہوں نے تمام سیاسی جماعتوں سے 27ویں ترمیم کی مخالفت کرنے کی اپیل بھی کی۔ اس سے قبل بانی پی ٹی آئی کے ایکس (سابق ٹوئٹر) اکاؤنٹ پابندی کیس میں اسلام آباد ہائی کورٹ نے جیل حکام کو حکم دیا کہ سلمان اکرم راجا کی آج ہی عمران خان سے ملاقات کروائی جائے۔ عدالت نے ڈپٹی اٹارنی جنرل اور نمائندہ اسٹیٹ کونسل کو ہدایت کی کہ وہ جیل حکام کو فون پر احکامات سے آگاہ کریں۔ سلمان اکرم راجا نے عدالت کو بتایا تھا کہ انہیں بانی پی ٹی آئی تک رسائی نہیں دی گئی تھی اور بغیر ہدایات لیے وہ جواب جمع نہیں کرا سکتے۔