وزیراعظم نے 27ویں آئینی ترمیم کی حمایت کی درخواست کی ہے، بلاول بھٹو زرداری

چیئرمین پاکستان پیپلز پارٹی (پی پی پی) بلاول بھٹو زرداری نے انکشاف کیا ہے کہ وزیراعظم شہباز شریف نے پیپلز پارٹی سے 27ویں آئینی ترمیم کی حمایت کی درخواست کی ہے۔ اس ترمیم میں آئینی عدالت کا قیام، ایگزیکٹو مجسٹریٹس کی بحالی اور ججز کے تبادلوں کا اختیار شامل ہے۔

اپنے سوشل میڈیا بیان میں بلاول بھٹو نے بتایا کہ مسلم لیگ (ن) کے وفد نے وزیراعظم شہباز شریف کی سربراہی میں صدر آصف علی زرداری اور ان سے ملاقات کی ہے۔ بلاول بھٹو کے مطابق، مجوزہ ترمیم میں این ایف سی ایوارڈ میں صوبوں کے حصے کا تحفظ ختم کرنے کی تجویز بھی شامل ہے، جبکہ آرٹیکل 243 میں ترمیم، تعلیم اور آبادی کی منصوبہ بندی کو دوبارہ وفاق کے ماتحت لانے کی تجاویز بھی ترمیم کا حصہ ہیں۔ انہوں نے مزید کہا کہ 27ویں آئینی ترمیم میں الیکشن کمیشن آف پاکستان کی تقرری کے معاملے پر ڈیڈ لاک ختم کرنے کے لیے بھی تبدیلی تجویز کی گئی ہے۔ بلاول بھٹو زرداری نے بتایا کہ صدر مملکت آصف علی زرداری کی قطر سے واپسی پر پیپلز پارٹی کی سینٹرل ایگزیکٹو کمیٹی (CEC) کا اجلاس 6 نومبر کو ہوگا، جس میں اس حوالے سے پارٹی کی پالیسی کا فیصلہ کیا جائے گا۔