پنجاب میں بلدیاتی انتخابات کی تیاری، الیکشن کمیشن نے حکومت سے ڈیٹا اور نقشے طلب کرلیے

الیکشن کمیشن نے پنجاب حکومت سے بلدیاتی انتخابات کے لیے ضروری ڈیٹا، نوٹیفکیشن اور نقشے فوری فراہم کرنے کی ہدایت کر دی۔

الیکشن کمیشن آف پاکستان (ای سی پی) نے پنجاب حکومت کو ہدایت کی ہے کہ بلدیاتی انتخابات کے انعقاد کے لیے فوری طور پر ضروری ڈیٹا، نقشے اور نوٹیفکیشن فراہم کیے جائیں۔ چیف الیکشن کمشنر سکندر سلطان راجہ کی زیرِ صدارت اجلاس میں اس معاملے پر تفصیلی غور کیا گیا۔ اجلاس میں چیف الیکشن کمشنر نے واضح کیا کہ بلدیاتی انتخابات کا انعقاد حکومت پنجاب اور الیکشن کمیشن، دونوں کی آئینی ذمہ داری ہے، لہٰذا حکومت اپنی ذمہ داری پوری کرے اور حلقہ بندیوں کے لیے تمام مطلوبہ معلومات جلد از جلد فراہم کرے۔ چیف سیکریٹری پنجاب نے اجلاس کو بتایا کہ لوکل گورنمنٹ ایکٹ 2025ء کے تحت حلقہ بندی رولز کا ڈرافٹ تیار کرلیا گیا ہے جو 15 نومبر تک الیکشن کمیشن کو بھجوا دیا جائے گا۔ حکومت 22 دسمبر تک بلدیاتی اداروں کی درجہ بندی کے نوٹیفکیشن اور 31 دسمبر تک یوسیز کی تعداد سے متعلق نوٹیفکیشن فراہم کرے گی، جبکہ تمام ٹاؤن، میونسپل کارپوریشن، میونسپل کمیٹی اور تحصیل کونسل کے نقشے 10 جنوری تک کمیشن کو ارسال کیے جائیں گے۔ ترجمان الیکشن کمیشن کے مطابق چیف الیکشن کمشنر نے ڈرافٹ رولز پر اپنی تجاویز حکومت پنجاب کو فراہم کر دی ہیں، اور تمام امور مقررہ شیڈول کے مطابق مکمل کیے جائیں گے تاکہ بلدیاتی انتخابات میں مزید تاخیر نہ ہو۔