تامل ناڈو میں لرزہ خیز واردات — شوہر نے بیوی کو قتل کرکے لاش کے ساتھ سیلفی واٹس ایپ اسٹیٹس پر لگادی

بھارتی ریاست تامل ناڈو میں ایک شخص نے اپنی علیحدگی اختیار کرنے والی اہلیہ کو ویمنز ہاسٹل میں گھس کر بہیمانہ انداز میں قتل کر دیا، اور پھر لاش کے ساتھ سیلفی لے کر واٹس ایپ اسٹیٹس پر اپ لوڈ کر دی۔

بھارتی میڈیا کے مطابق یہ دل دہلا دینے والا واقعہ گزشتہ روز تامل ناڈو کے ایک ویمنز ہاسٹل میں پیش آیا۔ شری پریا نامی خاتون، جو ایک نجی کمپنی میں ملازمت کرتی تھی، کچھ عرصے سے اپنے شوہر بالاموروگن سے علیحدہ رہ رہی تھی۔ اتوار کی دوپہر بالاموروگن اہلیہ سے ملنے کے بہانے ہاسٹل پہنچا۔ ملاقات کے دوران دونوں کے درمیان شدید تلخ کلامی ہوئی جس کے بعد ملزم نے اچانک درانتی نکال کر شری پریا پر حملہ کردیا، جس سے وہ موقع پر ہی جاں بحق ہوگئیں۔ واقعے کے بعد ملزم نے مقتولہ کی لاش کے ساتھ سیلفی لی اور اسے اپنے واٹس ایپ اسٹیٹس پر اپ لوڈ کر دیا، جہاں اس نے اپنی بیوی پر بے وفائی کا الزام بھی عائد کیا۔ بھارتی میڈیا کے مطابق کچھ دیر بعد بالاموروگن نے خود کو پولیس کے حوالے کر دیا۔ ابتدائی تحقیقات کے مطابق ملزم کو شبہ تھا کہ اس کی اہلیہ کا کسی اور مرد سے تعلق ہے، جس نے اس کے ذہنی رویّے کو مزید بگاڑا اور بالآخر یہ اندوہناک سانحہ رونما ہوا۔