عمرڪوٽ جي رڻ واري علائقي ۾ هڪ ٻار برساتي پاڻي ۾ ٻُڏي فوت، ٻن جي حالت ڳڻتي جوڳي

عمرڪوٽ (رپورٽ:ڪانجي مل رکيسر) عمرڪوٽ جي رڻ علائقي جي ڳوٺ ڪيرلو ۾ پيش آيل هڪ افسوسناڪ واقعي دوران برساتي پاڻي ۾ ٻُڏي هڪ معصوم ٻار فوت ٿي ويو، جڏهن ته ٻن ٻارن جي حالت ڳڻتي جوڳي ٻڌائي پئي وڃي، خبر موجب تازين برساتن جتي ريگستاني علائقن لاءِ رحمت بڻجي وسڪارو ڪيو آهي، اتي ئي ڳوٺ ڪيرلو جي هڪ خاندان لاءِ اها برسات وڏي الميي جو سبب بڻجي وئي، ٻڌايو پيو وڃي ته ٽيئي ٻار پنهنجي گهر ڀرسان برساتي پاڻي سان ڀريل هڪ کڏي جي ويجهو راند ڪري رهيا هئا ته اوچتو پير ترڪڻ سبب پاڻي ۾ ڪري پيا، واقعي جي نتيجي ۾ 8 ورهين جو ثناءُ الله پاڻي ۾ ٻڏي موقعي تي ئي فوت ٿي ويو، جڏهن ته علائقي واسين بروقت ڪارروائي ڪندي 12 ورهين جي راشد ۽ 3 ورهين جي اسد کي پاڻي مان ٻاهر ڪڍي بچائي ورتو، ٻنهي زخمي ٻارن کي فوري طور ضلعي هيڊڪوارٽر اسپتال عمرڪوٽ منتقل ڪيو ويو، جتي شروعاتي طبي امداد فراهم ڪرڻ کان پوءِ سندن حالت نازڪ هجڻ سبب وڌيڪَ علاج لاءِ حيدرآباد ريفر ڪيو ويو، واقعي کانپوءِ سڄي ڳوٺ ۾ سوڳ جي لهر ڇانيل آهي، جڏهن ته علائقي واسين انتظاميه کان مطالبو ڪيو آهي ته برساتي پاڻي سان ٺهندڙ خطرناڪ کڏن کي فوري طور ڀرايو وڃي ۽ اهڙن هنڌن تي حفاظتي اپاءَ ورتا وڃن، جيئن مستقبل ۾ اهڙن المناڪ حادثن کان بچي سگهجي.