نوشهروفيروز ۾ اي ڊي سي ون جي صدارت ھيٺ اجلاس

اجلاس ۾ سرڪاري ڀاڙن تي عملدرآمد ڪرائڻ بابت غور

نوشهروفيروز (ڊ ر) ضلعي ۾ عوام کي مناسب سفري سهولتون فراهم ڪرڻ ۽ سرڪاري ڀاڙن تي سختي سان عمل درآمد کي يقيني بڻائڻ لاءِ ايڊيشنل ڊپٽي ڪمشنر (ون) نوشهروفيروز محمد مستقيم قريشي جي صدارت هيٺ هڪ اهم اجلاس منعقد ٿيو. اجلاس ۾ ضلعي ٽرانسپورٽ اٿارٽي سيڪريٽري ضمير حسين بروهي، ٽريفڪ پوليس، اسسٽنٽ ڪمشنر ۽ ضلعي جي سڀني روٽس تي هلندڙ ٽرانسپورٽرن جي نمائندن شرڪت ڪئي. ايڊيشنل ڊپٽي ڪمشنر محمد مستقيم قريشي ٽرانسپورٽرن کي واضح ڪيو ته سنڌ حڪومت پاران مقرر ڪيل ڀاڙن جي فهرست تي هر وقت عمل ڪيو وڃي ۽ ڪنهن به حالت ۾ عوام کان وڌيڪ ڀاڙو نه ورتو ويندو. سڀني بس مالڪن ۽ ڊرائيورن کي هدايت ڪئي وئي ته اهي مسافر گاڏين ۽ بس اسٽينڊ تي نمايان هنڌن تي سرڪاري ڀاڙن جي فهرست لڳائين ته جيئن مسافر صحيح معلومات حاصل ڪري سگهن. ٽرئفڪ پوليس ۽ لاڳاپيل آفيسرن کي هدايت ڪئي وئي ته روٽس جي باقاعده تلاشي وٺن ۽ وڌيڪ ڀاڙا يا اوور لوڊنگ ۾ ملوث گاڏين تي ڳري جرمانا لاڳو ڪن ۽ گڏوگڏ گاڏين کي ضبط ڪن. ٽرانسپورٽرن کي هدايت ڪئي وئي ته گاڏين جي فٽنيس جي حالت برقرار رکن ۽ مسافرن سان سٺو سلوڪ ڪن. ايڊيشنل ڊپٽي ڪمشنر چيو ته عوام جو استحصال ڪنهن به حالت ۾ برداشت نه ڪيو ويندو ۽ اوور چارج ڪندڙ ٽرانسپورٽرن خلاف سخت قانوني ڪارروائي ڪئي ويندي. هن سيڪريٽري ريجنل ٽرانسپورٽ اٿارٽي کي هدايت ڪئي ته روزاني بنيادن تي گاڏين جي فٽنيس، روٽ پرمٽ، سي اين جي سلنڈر ۽ ڀاڙن جي جانچ ڪئي وڃي ۽ رپورٽ فراهم ڪئي وڃي. هن چيو ته قانون جي ڀڃڪڙي ڪندڙ ٽرانسپورٽرن خلاف قانوني ڪارروائي ڪئي وڃي.