ملير ۾ صحافي عدم تحفظ جو شڪار، فائرنگ ۽ ڦرن جي واقعن تي احتجاج جو اعلان

عوامي پريس ڪلب ملير جو هنگامي اجلاس ڪوٺايو ويو، عهديدارن ۽ صحافين جي شرڪت

ملير (رپورٽ: عبدالرشيد مورجھريو) ڪراچي شهر صحافين خلاف ڏوهارين جون ڪارروائيون رڪجي نه سگهيون آهن مختلف علائقن ۾ مسلسل صحافين خلاف فائرنگ ۽ ڦر مار جا واقعا جاري آهن جن تي صحافتي حلقن سخت ڳڻتي جو اظهار ڪندي احتجاج جو اعلان ڪيو آهي ان سلسلي ملير ۾ نجي ٽي وي جي اينڪر پرسن امتياز مير تي اڻڄاتل هٿياربندن فائرنگ ڪئي جنهن ۾ هو زخمي ٿي پيو پر خوش قسمتي سان سندس جان بچي ويئي جڏهن ته عوامي پريس ڪلب ملير ۽ ڪراچي يونين آف جرنلسٽس (ڪي يو جي ورڪرز) جي ميمبر طارق سهتو پنهنجي گهر ڀاتين سان گڏ قائد پل ڀرسان وڃي رهيو هو ته موٽرسائيڪل سوار هٿياربندن گاڏي کي گهيري ورتو ۽ هٿيارن جي زور تي موبايل فون، نقدي ۽ قيمتي سامان ڦري فرار ٿي ويا۔ساڳي ڏينهن ڊفينس ڀرسان ٻه صحافي بشارت شاهه ۽ جاويد ابدالي به هٿياربندن جي ور چڙهي ويا جن کان هٿيارن جي زور تي موبايل ۽ ٻيا سامان ڦر ڪري ويا۔انهن واقعن بعد عوامي پريس ڪلب ملير جو هنگامي اجلاس ڪوٺايو ويو، جنهن ۾ عهديدارن ۽ صحافين ڳڻتي جو اظهار ڪيو آهي اجلاس ۾ چيو ويو ته صحافي اڳ ئي دٻاءُ ۽ خطري هيٺ ڪم ڪري رهيا آهن، پر هاڻي ڏوهاري به کين نشانو بڻائي رهيا آهن۔ جيڪڏهن فوري طور تحفظاتي قدم نه کنيا ويا ته صحافتي برادري احتجاج ڪرڻ تي مجبور ٿيندي عوامي پريس ڪلب ملير جي عهديدارن اعلان ڪيو آهي ته صحافين تي وڌندڙ حملن ۽ لٽ مار خلاف سخت احتجاج ڪيو ويندو ۽ حڪومت ۽ لاڳاپيل ادارن کان مطالبو ڪيو ويو آهي ته صحافين کي تحفظ فراهم ڪيو وڃي ۽ ملوث ڏوهارين کي فوري طور گرفتار ڪري کين سزا ڏني وڃي۔