عمرڪوٽ: 5ٻارن جي ماءُ باهه لڳڻ سبب سڙي زخمي، سهري ۽ مڙس تي ساڙي مارڻ جي ڪوشش جو الزام

ڳوٺ ڀوڄو ڪولهي ۾ باهه لڳڻ سبب مينا زال اشوڪ ميگهواڙ سخت زخمي ٿي پئي، اسپتال منتقل

عمرڪوٽ ( ڊ ، ر ) عمرڪوٽ جي ڳوٺ ڀوڄو ڪولھي، صوفي شاخ ۾ پنج ٻارن جي ماءُ مينا زال اشوڪ ميگھواڙ تي سندس مڙس ۽ سھري مبينا طور باهه ڏئي ساڙڻ جي ڪوشش ڪئي، باهه لڳڻ سبب عورت سخت زخمي ٿي وئي ۽ کيس سول اسپتال عمرڪوٽ منتقل ڪيو ويو، جتي ڊاڪٽرن ٻڌايو ته عورت جي هڪ ٽنگ 70 فيصد سڙي وئي آهي، بودرفارم ٿاڻي تي متاثر عورت جي ڀاءُ ماوجي ميگھواڙ جي فرياد تي ڪيس داخل ڪيو ويو، پوليس ساھوري لوڻو ميگھواڙ کي گرفتار ڪري ورتو آهي، جڏهن ته مڙس اشوڪ جي گرفتاري لاءِ ڇاپا ھنيا پيا وڃن، گرفتار جوابدار کي عدالت ۾ پيش ڪيو ويندو، متاثر عورت جي ڀاءُ ٻڌايو ته مينا تي مڙس ۽ ساھوري اڳ به تشدد ڪندا رهيا آهن، ڪجهه سال اڳ وومين ٿاڻي عمرڪوٽ تي ڪيس به داخل ٿيو هو، پر صلح ٿيڻ کان پوءِ کيس ٻيهر سسرال موڪليو ويو، هاڻي وري باهه ڏئي ساڙڻ جي ڪوشش ڪئي وئي آهي.