کراچی: ڈاؤ یونیورسٹی آف ہیلتھ سائنسز نے شو مارکیٹ اور نشتر روڈ کے نواحی علاقوں کے عوام کی آسان رسائی کے لیے ڈاؤ لیب کا افتتاح کردیا، نئی برانچ کا افتتاح رجسٹرار ڈاؤ یونیورسٹی ڈاکٹر اشعر آفاق نے کیا اس موقع پر ڈائریکٹر کمرشل اینڈ آپریشنز سلیم چوہان ،ڈائریکٹر ایچ آر پیرمدثر علی شاہ بھی موجود تھے۔ڈاکٹر اشعر آفاق نے کہا کہ بشمول کراچی، اندرون سندھ اور بلوچستان کے 17 شہروں میں لگ بھگ 92 ڈاؤ لیبز موجود ہیں، جن کا مقصد بہت کم نرخوں پر بہترین اور معیاری ٹیسٹ کی سہولت فراہم کرنا ہے، انہوں نے کہا کہ ڈاؤ کی اس نئی تشخیصی لیب کا مقصد ضرورت مند مریضوں کے لیے مسلسل اور قابل اعتماد ٹیسٹ کی سہولت کی فراہمی کو یقینی بنانا ہے۔انہوں نے اس موقع پر تمام ٹیم کو نئی برانچ کے کامیاب قیام پر مبارکباد دی اور اُن کی محنت و لگن کو سراہا۔انہوں نے کہا کہ یہ نئی برانچ عوام کو طبی سہولیات کی فراہمی میں مدد دینے میں اہم کردار ادا کرے گی، بعدازاں ڈاؤ لیب کے ڈائریکٹر کمرشل اینڈ آپریشنز سلیم چوہان نے کہا کہ توسیعی منصوبے کے ساتھ ساتھ ہماری توجہ سروس کا معیار مزید بہتر بنانے پر مرکوز ہے، مزید برآں عوام کو ان کی سہولت کے مطابق خدمات فراہم کرنے کے لیے دیگر نئے منصوبوں پر غور جاری ہے تاکہ بہتر خدمات کے ساتھ ساتھ بہتر سے بہترین سروس کم قیمت پر لوگوں کو ان کے گھر کے قریب مل سکیں قبل ازیں رجسٹرار ڈاکٹر اشعر آفاق نے ربن کاٹ کر نئی برانچ کا افتتاح کیا۔
0 تبصرے