ملير: ريڙهي ڳوٺ تي ايس ايس پي ڊاڪٽر عبدالخالق پيرزادو جي اڳواڻي ۾ چڙهائي

ڪارروائي دوران منشيات جا اڏا مڪمل طور ڊاهي پٽ ڪيا ويا ۽ ڪيترن ئي جوابدارن کي گرفتار ڪيو ويو: پوليس

ملير (رپورٽ: عبدالرشيد مورجھريو) ايس ايس پي ملير ڊاڪٽر عبدالخالق پيرزادو جي اڳواڻيءَ ۾ پوليس پاران ٿاڻي سڪڻ جي حد ريڙهي ڳوٺ ۾ منشيات وڪڻندڙن خلاف وڏو آپريشن ڪيو ويو، جنهن دوران منشيات جا اڏا مڪمل طور ڊاهي پٽ ڪيا ويا ۽ ڪيترن ئي جوابدارن کي گرفتار ڪيو ويو، جن ۾ عورتون پڻ شامل آهن.ايس ايس پي ملير پاڻ موقعي تي موجود رهيا ۽ آپريشن جي سڌي نگراني ڪئي. پوليس جي وڏي نفري، ايس ايڇ اوز، ڊي ايس پيز، ليڊي پوليس ۽ انٽيليجنس عملي آپريشن ۾ ڀرپور شرڪت ڪئي. ريڙهي ڳوٺ کي هر طرف کان گهيري ۾ آڻي ان جا داخلي ۽ خارجي رستا مڪمل طور بند ڪيا ويا. ڳجهي اطلاع ۽ جديد ٽيڪنيڪل ذريعن جي مدد سان مخصوص جڳهن جي سڃاڻپ ڪئي وئي. پوليس اهلڪارن باڊي وورن ڪيمرائن سان گڏ سرچ آپريشن ڪيو، جڏهن ته ڪيترن ئي شڪي ماڻهن کي جديد ڊوائيسز جي مدد سان چيڪ ڪيو ويو.ايس ايس پي ملير جو چوڻ هو ته گرفتار جوابدار منشيات جي ترسيل جي نيٽ ورڪ ۾ سرگرم هئا. هن واضح ڪيو ته منشيات فروش معاشري جا دشمن آهن، انهن خلاف زيرو ٽولرنس پاليسي تحت ڪارروايون جاري رهنديون.