شڪارپور پوليس جون ڪارروائيون، 7 جواري گرفتار

ڪارروائين دوران چوري ٿيل چوپايو مال ۽ 3 موٽرسائيڪلون هٿ

شڪارپور ( احسان ابڙو ) شڪارپور پوليس جون ڪارروائيون، چوري ٿيل مال مويشي ۽ 3 موٽر سائيڪلون هٿ، 7 جوا کيڏندڙ گرفتار، ڪيس داخل. ايس ايس پي شڪارپور شاهزيب چاچڙ جي هدايتن تي ضلعي جي مختلف ٿاڻن پاران ڏوھارين خلاف ڪامياب ڪارروائيون ڪيون ويون. پوليس ڪارروائين دوران چوري/ڦر ٿيل موٽر سائيڪلون، مينهون ۽ ڳئون هٿ ڪيون ويون، جڏهن ته جوا کيڏڻ ۾ ملوث ست ڄڻن کي به گرفتار ڪيو ويو. ڊي ايس پي ڳڙهي ياسين ظھور احمد سومرو جي نگراني ۾ ٿاڻي ڳڙهي ياسين جي پوليس مختلف هنڌن تي ڪارروائيون ڪري ٻه موٽر سائيڪلون هٿ ڪيون، جيڪي اصل مالڪ عبدالوهـاب سومرو ۽ مولا بخش جيهو حوالي ڪيون ويون. اهڙيءَ ريت ٿاڻي ڪرن پوليس هڪ ٻي موٽر سائيڪل هٿ ڪئي، جيڪا اصل مالڪ غلام شبير جمالي حوالي ڪئي وئي. ٻئي طرف، ٿاڻي دلآور معرفاڻي پوليس وڏي ڪارروائي ڪندي 11 مينهون ۽ 7 ڳئون هٿ ڪري اصل مالڪ انصاف خان جعفري حوالي ڪري ڇڏيون. ان کانسواءِ، ٿاڻي لکيدر پوليس جوا جي اڏي تي ڇاپو هڻي ست جوا کيڏندڙن کي گرفتار ڪيو. گرفتار ٿيلن ۾ برڪت مهر، رضوان، برڪت، خوش محمد، سراج سومرو، امداد ۽ زوهيب سومرو شامل آهن. پوليس انهن وٽان 5,500 رپيا روڪ رقم ۽ موبائيل فونز هٿ ڪيا آهن. سندن خلاف جوا جي قانون تحت ڪيس داخل ڪيو ويو آهي. ان موقعي تي ايس ايس پي شڪارپور شاهزيب چاچڙ چيو آهي ته عوام جي جان ۽ مال جي تحفظ، ۽ ضلعي ۾ امن امان جي بحالي لاءِ پوليس جون ڪارروايون جاري رهنديون. ڏوھارين لاءِ ڪا به رعايت نه ڪئي ويندي.