عمرڪوٽ: ڳوٺ شفيع مڱريو ۾ مال جي واڙي تي سُتل پيرسن جو گوليون لڳل لاش هٿ

عمرڪوٽ (رپورٽ: ڪانجي مل رکيسر) عمرڪوٽ جي علائقي ڇور ڀرسان ڳوٺ شفيع مڱريو ۾ هڪ افسوسناڪ واردات پيش آئي، جتي مال جي واڙي تي سُتل پيرسن شخص نبي بخش ولد ارباب علي مڱريو جي گوليون لڳل لاش هٿ، مقتول جو لاش واڙي مان صبح سوير هٿ اچڻ بعد علائقي ۾ ڏهڪاءُ پکڙجي ويو، اطلاع ملڻ تي ڇور پوليس ۽ علائقي واسي واقعي واري هنڌ پهچي ويا، مقتول نبي بخش مڱريو اڪيلو مال جي واڙي تي رهندو هو ۽ چوپايو مال سنڀاليندو هو، وارثن موجب هو هر رات واڙي تي سمهندو هو، گذريل رات نامعلوم هٿياربند فائرنگ ڪري کيس بي رحماڻي نموني قتل ڪري فرار ٿي ويا، مقتول جي ڀاءُ مراد مڱريو ميڊيا سان ڳالهائيندي چيو ته اسان جي ڪنهن سان به دشمني يا تڪرار نه آهي، ڀاءُ رات ماني کائي معمول مطابق واڙي تي سمهي پيو، صبح پوليس کان لاش جي خبر ملي، اسان مطالبو ڪريون ٿا ته پوليس شفاف جاچ ڪري قاتلن کي گرفتار ڪري، جڏھن تہ پوليس جو چوڻ آهي ته واقعي جي مختلف رخن کان جاچ ڪئي پئي وڃي ۽ پوسٽ مارٽم رپورٽ اچڻ بعد وڌيڪَ حقيقتون سامهون اينديون، ڇور پوليس موجب، هن قتل ڪيس جي پٺيان جا محرڪ معلوم ڪرڻ لاءِ جاچ جو دائرو وڌايو ويو آهي، واقعي سان لاڳاپيل ماڻهن کان بيان ورتا پيا وڃن ۽ جلد قاتلن جي گرفتاري جي اميد ظاهر ڪئي وئي آهي.